Awe diasabra 20 di november, ta Dia Internacional di Mucha. E fecha aki no a wordo estableci djis pa tin un dia mas pa celebra mucha, sino pa recorda nos cu e muchanan tin derecho. Muchanan ta e futuro di nos pais y ta p’esey mes nos mester brinda nos muchanan tur e proteccion, educacion y guia cu ta posibel pa nan por crece bira grandi y bira adultonan responsabel. Esaki kiermen cu nos mester conoce e derechonan aki y garantisa cu semper e muchanan por ta gozando di esaki. Yudando y educando nos muchanan di un edad hoben nos por inspira y establece principionan fuerte den nan pa asina nan tambe por ta mayornan y lidernan responsabel den nos comunidad.
Pasatempo di calidad cu nos muchanan y duna nan e amor y afecto cu nan ta desea y merece, ta di vital importancia den nan formacion. P’esey e ta importante pa nos como mayornan biba segun principio y moral halto pa asina nos matrimonio keda fuerte y asina inspira nos chikitonan pa haci mescos. Hogarnan fuerte ta lanta muchanan fuerte y sano. Nos nacion lo ta uno mas productivo ora nos haci tur loke ta posibel pa nos muchanan crece y lanta den un ambiente familiar cu hopi amor, proteccion y di bon ehempel. Laga nos stimula nan creatividad y inspira nan, pa nan practica un deporte. Esaki ta crea den nan un sentido di disciplina y proposito den bida. E ta yuda forma nan caracter tambe mientras nan ta socialisa cu otro muchanan cu e mesun interesnan.
Recientemente un articulo a sali den prensa cual a establece cu nos ta e di dos nacion cu mas divorcio na mundo. Divorcio ta hopi devastador pa nos muchanan y ta afectanan enormemente. E consecuencianan di divorcio ta marca nos muchanan hopi mas di loke nos ta pensa. E ta importante pa nos cuida nos muchanan y protehanan bao di tur circunstancia. Den un mundo cu cada bes nos ta wak hopi mas maldad contra muchanan, nos mester sigui ta e ehempel pa nan bidanan cu apenas a cuminsa desaroya. Algun di e derechonan di mucha ta:
E derecho pa nace bon, e derecho di educacion, e derecho di come, e derecho di salud, e derecho di Identidad, e derecho di libertad, e derecho di proteccion, e derecho di ricibi amor. Nos ta biba den un comunidad chikito, pesey laga nos ta hop consciente cu tin hopi hende cu lo kier haci daño na nos muchanan. Laga no sno ta negligente ni ignorante di e gran berdad aki.
Na nos muchanan, mi ta deseanan tur un feliz dia di mucha y na tur mayor mi ta spera cada un por haci algo creativo y dibertido cu boso yiunan. Pabien muchanan di Aruba!
