Aunke con scur e enemigo por pinta bo caminda Dios tin un salida, kico cu bo por a haci den bo bida, no ta obligabo di keda semper mara y semper keda cana den berguensa, pasobra e palabra di Dios ta duna salida, aunque hende por culpabo, Dios den su gran Amor por ta liber.
No keda pega den bo pasado, nos tur a peca, nos tur a faya, no tin ningun hende bon aki na mundo solamente Dios.Un Divorcio, Preso, Aborto, Adulterio, y kico mas cu bo por a haci, no ta un motibo, pa bo biba bao di sombra di hende, cu bo no ta sali cas, bo ta sconde pa famia, bo ta evita di papia cu cierto hende, pasobra den bo pensamento nan ta mihor cu bo, Mi kier bisabo den un palabra, cu bo pensamento cu bo ta menos , door cu den bo bida , bo a yega di haci un fout, ta limita bo mes di crece.
Ta pesey Hesus ta ofrece un oportunidad unico cual hende no por ofrece, ningun instancia, no por ofrece, ningun gobierno na mundo no por ofrece.Ta para scirbi den 2 Corintio Capitulo 5 vers 17 ,Pesey si un hende ta den Cristo ta un criatura nobo e ta , tur cos bieuw a pasa , ata tur cos a bira nobo. No tin dokter na mundo cu por ofrece un algo igual, pasobra esaki no ta un terapia pero un bida nobo, cu solamente e Creador por ofrece.Dios kier demostra cu tin poder riba diabel, cu tur locual e enemigo a daña of destrui of susha durante añanan , Dios tin poder pa lante completamente di nobo, esey ta nifica cu Dios no ta recycle, pero e ta haci nos un persona nobo, cu un mente renoba cu ya no ta biba mas den nos pasado pero tin un conocemento di nos Salbador, kende a duna nos un bida nobo den Dje.Ta nos tur tin mester di Dje, no ta importa bo color, raza of credo, no ta importa rico of pober, studia of no studia, bo posicion, bo gremio, nada di esaki no ta importa, tur hende mester di Cristo den nan bida, pa asina nan ta salba, pasobra salbacion ta bini solamemente y unicamente di Cristo Hesus, y e no ta mara na ningun religion.
E ta sosode ora bo reconoce y entrega bo mes na Cristo Hesus y E tin e autoridad di cambia bo bida. Bo bida no ta cambia, cu calmante, bo bida no ta cambia cu placa y poder, bo bida ta cambia, ora bo entrega bo mes na Dios.Ta hopi hende ta purba pa lanta riba nan mes forsa, pa drecha cosnan riba nan mes forsa, y nos tur ta mira cuanto hende a lanta ariba manera padestoel ofreciendo ayudo nan Famia, matrimonio, bisando cu nan por drecha cos, drecha relacion kibra, trece esnan stima cu a bay, pero locual tur hende tin cu compronde cu si bo kier pa bo famia, bo cas y bo hogar ta bon , e unico solucion ta entrega bo mes y bo familia na Dios, Dicon? Pasobra ora bo ta den un necesidad, enfermedad, problema, crisis, ta su nomber ta e unico nomber cu por yuda.Pasobra tin hopi cu ta yama nan mes Dios pero e unico cu ta sana , ta nos Dios Todopoderoso.Ningun a muri na cruz , a wordo dera y a resusita despues di tres dia. Pa tur locual nos kier cuminsa di nobo, laga nos ancra den un bida nobo cu Cristo, den cual lo bo conoce pordon y bendicion, gracia, y favor, misericordia, y mas cu tur cos bo ta siña pordona y stima bo prohimo.
Si bo a yega di pasa den cualquier situacion desagradable, y bo ta sinti cu bo no por mas, si bida a dal bo un golpi duro bao di faha, si hende a tracionabo, bo a perde trabao , bo tin problema cu bo yiunan, bo casa, of bo esposa ta den rebeldia, si vicio a ataka bo bida y hogar, si bo a perde tur cos. Nos kier bisabo cu bo no a perde Dios , Dios ta mas serca di bo cu bo ta kere, Dios ta fiel y berdadero, ora tur hende corre bay lagabo, Dios tey pa yudabo.Por ta bo a busca hoooopi salida, pero te ainda berguensa, y humiliacion, ta persigibo, awel tin un caminda pabo, cu lo hiba bo na un bida nobo, un caminda di claridad, y no di scuridad, bo no tin nada di paga, bo no tin di traha cita cu ningun hende, Dios tey pa bo tur momento, ningun hende lo husgabo pasobra Dios lo pordonabo, y E mes lo seca bo lagrima, locual nos ta scirbibo, ta e formula pa bo sali for di gara di e enemigo, y tambe di biba bao di presion di hende.No tarda mas hacie awe mes, pa e libertad di bo bida bo cas y bo famia.2 Corintio 5 versiculo 17 ta bo solucion, tambe pa henter bo hogar.Dios ta Pordona, e ta Lubida y e ta duna bida Nobo.
