E caso ta data di aña 2018. Corte a conclui cu berdad e formulario ta yena robes, pero no intencionalmente. Si el a haya Easy Cargo Aruba responsabel pa esaki pasobra no a haci investigacion debido. E violacion administrativo aki a tuma luga dos biaha door di e mesun compania y cu e mesun cliente.
E prome biaha, segun e citacion di Corte, el a tuma luga entre 11 y 14 di september 2018, ora cu a yena e formulario di importacion pa 31 caha (cu 12 botter di 500 ml cada un). Riba e formulario di ASYCUDA a skirbi cu ta trata di “kookwijn”. Pero e likido den e botternan tabatin un grado di alcohol di 29%.
Prome cu esey, entre 9 y 10 di augustus di 2018, a importa bebidanan distila cu un contenido di alcohol di 29%. Tabata trata di 300 boter di Pearl River Bridge di 500ml y 120 boter di 75 ml. Esakinan tambe el a registra nan riba formularionan di Duana como “kookwijn”.
E diferencia ta cu riba “kookwijn” ta paga solamente 6% na invoerrechten, mientras cu riba bebidanan mas pisa e tarifa ta mas halto. Den ambos caso a descubri e eror aki na momento cu miembronan di Duana a bay controla e containernan na e negoshi y a descubri cu no tabata trata di “kookwijn”. Mesora a start un investigacion.
A interoga director di e compania di carga, Clifford Tromp y e cliente, un negoshi situa na Mahuma. E cliente a bisa cu e prome biaha el a bisa e persona di e compania cu ta trata di likeur y como cu e no tabata sa con pa skirbie, el a skirbi “lico” riba un papel p’e. E di dos biaha el a hala nan atencion pa no comete e eror di prome biaha atrobe, pa corda cu ta licor e ta. Pero ningun dia nan a yama puntr’e ki tipo di licor e productonan ta ni e grado di alcohol cu nan ta contene. El a bisa tambe cu for di 2008 e ta traha cu e compania di carga aki, pa importacion di su productonan.
Director di e compania di carga a declara na Douane Recherche cu nan a bay busca informacion di e producto riba internet y a base di esey a pone e descripcion “kookwijn”. El a mustra e potret cu nan a haya di e producto. Y el a bisa cu nan no tabatin tur informacion cu miembronan di Duana a mustra nan despues y si tabatin esey lo no a comete e eror. A admiti tambe cu no a puntra e cliente e grado di alcohol di e bebidanan. E ley ta cu biña cu tin mas di 21% di alcohol ta considera como un bebida distila.
Conclusion di Corte tabata cu e compania di carga no a haci suficiente investigacion riba e productonan prome cu a yena e formulario. “Esaki ta cay pa cuenta di e director. E ta esun cu mester informa su empleadonan miho, ora cu e cliente a mustr’e riba un eror cometi anteriormente,” ta skirbi den e sentencia. A base di esaki a impone un boet di 22.500 florin.
Easy Cargo Aruba, Logistics & Enterprises VBA ta inscribi desde 2012 na Camara di Comercio mietras cu riba website di e compania ta menciona cu nan ta den e industria aki desde aña 1979 caba. Cu esaki e directornan tin un experiencia hopi amplio den carga y logistica. No ta prome biaha cu nan ta haya nan den problema cu Duana cu a conduci na un condena.
