Marc Figaroa (APA): Mundo crucero ta stabiel cu hopi potencial pa crece

Aruba Ports Authority sigur ta hopi satisfecho cu e mundo crucero. Director di APA, Marc Figaroa, a splica cu nan tin un bentaha aworaki cu nan tin cu probecha. Mundo crucero ta stabiel cu hopi potencial pa crece. Nan tin un bon cooperacion cu ATA, unda cu nan ta traha hunto riba strategia, cu nan ta acerca e crucero.

APA ta satisfecho den e sentido cu e cruceronan kier keda bin Aruba. Aruba tin un bon producto eyfo, un bon nomber, cu ta haci’e atractivo tambe pa e cruceronan.

 

Tambe APA tin un bon relacion cu Corsou y Boneiro, trahando hunto pa acerca e cruceronan hunto pa atrae mas barco pa e area aki banda. 

Den mundo crucero tin e high y low season, compara cu aviacion, cual ta mas minimo. Den e parti crucero, caminda cu ya den temporada di mei, juni, juli, augustus y september, e cantidad ta baha. Pero ya na october e ta pick up. Loke ta trahando tambe riba dje, ta e parti ey. Ta bay pone mas enfoke pa asina atrae mas barco crucero den e temporada abao.

Awor aki tin high season na Europa pa loke ta crucero. Mayoria di e liñanan crucero ta coy nan barconan hiba nan Europa pa e cruceronan den Mediteraneo, e biahenan den Baltico etc. P’esey tin cu bay wak kico por ofrece cu por mantene nan barco den Caribe den temporadanan asina.

Waf

 

El a splica cu tin dianan cu no tin barco mara den haf, y otro dianan ta haya varios barco pareu di bishita.  Segun Figaroa, e problema ta e homeport tin biaha cu ta San Juan, Miami, Port Cañaveral. E dia di salida di nan ta den fin di siman. Pa ora cu yega den e region, esta Caribe Sur, ya ta memey den siman. Hopi biaha esey ta un reto, cu no por ta hopi flexibel. Loke ta purbando, pa traha cu Corsou y Boneiro, si den caso cu ta un itinerario cu ta pasa e tres islanan aki, si tin espacio cu por swap. E no ta facil, segun Figaroa, a bisa. 

E situacion di waf mes

Tabata tin cierto trabaonan cu mester a tuma luga pa loke ta infrastructura, tanto riba waf como pafo di waf. Figaroa a splica cu esaki ta forma parti di nan plan, miirando e demanda di mega cruceronan pa bishita Aruba.  Segun Figaroa, pa fin di otro aña of pa comienso di 2021, tin interes cerca barconan grandi pa bishita Aruba. Conforme e plannan, tin cu haci cierto dredging, pero tur esaki ta hinca den nan presupuesto. Pa aloca e presupuesto, ta haci’e conforme e tempo cu e barconan mester yega. No ta papia aki di un trabou grandi. E ta algo cu e mega cruceronan ta pidi pa siguridad na momento cu nan mester maniobra pa drenta waf y ora di sali. Awor aki por acomoda e barconan aki caba, pero pa tin un bufferzone, ta bay haci un extra dredging. 

Loke ta evaluando aworaki ta bay modernisa e terminal crucero y mira un miho forma pa acomoda e cruceronan.  

 

Placa

Mundo crucero ta trek placa pa tanto APA como pa comercio. Sinembargo ta busca manera pa atrae mas placa pa APA. Tambe tin cu pensa riba e touroperatornan, taxi, souvenirs. Cada crucero tin su passenger profile. Tin cu ta gusta un tipo di tours, tin ta gusta private tour, tin ta gusta high end, tin ta gusta souvernirs. Tin un variacion cu ta acomoda pa tur hende, segun Figaroa.

 

Plannan pa 2020

Aña 2020 ta mustra positivo. A kere cu pa e aña a cera rond di 800 mil pasahero crucero. Pa 2020 ta premira cu e ta cera den e mesun cantidad. E parti crucero ya caba e reservacionnan ta cuminsa drenta. E ta mustra cu e ta bay ta den e direccion eynan.

 

Nos isla

E producto cu ATA ta haciendo, tin nomber di Aruba na halto. Aruba tin un nomber grandi y den un forma positivo y loke nos hendenan ta ofrece. Loke tur mester ta conciente ta cu e parti di siguridad y e amabilidad cu nos Arubianonan ta conoci p’e, nunca nos mester perde. Bo bay bek riba e feedback cu ta haya ta un di e partinan crucial. Esey ta algo cu nos tin cu bringa pa nos por mantene. Esey ta tene nos nomber tambe na halto, Figaroa a bisa por ultimo.