Siman pasa Parlamento a aproba e ley di Landsverordering Normering Topinkomens (LNT) cu 12 voto na fabor y 9 contra. Na e ocacion ey, e fraccion di Accion21 a vota na fabor di e ley, hunto cu MEP y RAIZ. Pero, a bin cu algun amienda den e ley aki cu a haci cu no a mantene na e ley original, sino a drech’e. Casi por bisa cu nada lo no sosode pasobra a purba “acomoda” tur hende den e ley. Tanto e minister como e director di e entidadnan di gobierno.
E hugada aki a bin manera e ultimo druppel den e hemchi, cu ya tabata yen caba. Gobierno di Hulanda, BZK y CAft no a tuma e cambio aki den bon tera. Nan ta sinti cu Gabinete Wever-Croes ta purba hunga e wega di “good cop – bad cop” cu nan. Pasobra di un banda a prepara un documento, a acord’e, a firm’e y a sigura cu ta ehecutando tur cos manera acorda…y na final ta haci lo contrario ora trat’e den Parlamento.
Locual Gobierno di Aruba a acorda cu Gobierno di Hulanda no ta refleha den e ley cu a mira luz di dia siman pasa. Pasobra durante e reunion, e mesun partido na mando, esta e coalicion di MEP y RAIZ a pasa amienda, den cual a cambia henter e spirito di spaar y reduci beneficionan desproporcional den gobierno of den companianan estatal. Door di hisa e blafon den Parlamento, a haci cu casi no por papia di reduccion di ningun salario mas, ni di acuerdonan den cual director y hasta algun trahado ta cobra 15 luna di salario den un solo aña! Pa e articulo completo, lesa e edicion di TREMPAN di awe.
