Maneho nobo di permiso: Despues di 30 aña solamente permiso temporal di maximo tres aña
Minister encarga cu Asunto di Stranheria (DIMAS), mr. drs. Arthur Dowers, a anuncia un giro importante den e maneho di admision di permiso na Aruba, unda peticionnan pa keda biba permanentemente den e pais lo wordo limita na personanan te cu 30 aña di edad.
Segun e mandatario, e medida aki – cu ta bay wordo introduci entrante januari – tin como meta protege tanto e futuro di e solicitante como sostenibilidad di e fondonan social y pensioen di Aruba. Durante su declaracion, Dowers a splica cu autoridadnan a nota peticionnan di personanan di 60 aña cu ta pidi permiso te na 65 aña. Aunke el a enfatisa cu hende por tin e deseo di bin Aruba, el a señala cu drenta e pais na un edad asina halto no ta cuadra cu un planificacion sostenibel pa futuro ni cu e realidad financiero di e sistema social.
Limite di edad y permiso temporal
Bao di e maneho nobo cu lo wordo anuncia den januari entrante, lo aplica e siguiente reglanan pa loke ta trata edad y tipo di permiso. Pa keda biba na Aruba solamente personanan di 30 aña of mas abou lo por pidi un permiso cu ta duna espacio pa keda biba na Aruba.
Ariba di 30 aña: Personanan cu ta surpasa e edad di 30 aña y cu kier bin Aruba lo por aplica solamente pa un permiso temporal, cu un duracion maximo di tres aña. Despues di 65 aña, minister Dowrs a splica cu si un persona yega despues di 65 aña, e no ta haya nada mas na pais Aruba mas.
Pa ilustra e motibonan tras di e proposicion, e minister a referi na cifranan relaciona cu acumulacion di pensioen segun e edad na cual un persona ta drenta Aruba. El a indica cu si un hende drenta cu 18 aña of menos, ora e yega na edad di pensioen e por ricibi 1.313, mientras cu un persona cu drenta cu 62 aña lo haya apenas 84 florin. Tambe el a menciona casonan unda un persona di 45 aña lo ricibi entre 550 pa 600 florin di pensioen, un suma cu segun e mandatario no ta suficiente pa biba di dje.
Como comparacion adicional, Dowers a splica cu esun cu drenta na 30 aña ta keda riba 978 di pensioen despues di traha 35 aña, mientras cu esun cu yega cu 18 aña y crece den e pais por yega na un pensioen completo.
Pa relato amplio lesa TREMPAN.



