Home » Aruba ta habri Vierlandenoverleg 2026 cu enfasis riba prevencion di alcohol

Aruba ta habri Vierlandenoverleg 2026 cu enfasis riba prevencion di alcohol

by Victoria

Minister di Salubridad, Asunto Social, Cuido di Adulto Mayor y Maneho di Adiccion, Mervin Wyatt-Ras, a habri oficialmente e encuentro Ministerial di e di shete Vierlandenoverleg Volksgezondheid 2026 na Aruba, diahuebs 19 di november.

Durante e programa di mainta, e Ministernan a asisti tambe na e presentacion di NOTHING NADA NIX18, un campaña conhunto di prevencion di consumo di alcohol entre hobennan menor di 18 aña.

E apertura oficial a conta cu presencia di Minister Mirjam Sterk di Hulanda, Minister Tyron Boekhoudt di Corsou y Minister Claret Connor di Sint Maarten, hunto cu representantenan y expertonan di e delegacionnan di e cuater paisnan.

Durante su discurso di apertura, Minister Wyatt-Ras a destaca cu na 2015 e cuater paisnan a reuni na Aruba pa establece un base pa cooperacion den salubridad publico. Mas di dies aña despues, e compromiso pa sigui traha hunto ta keda igual di importante.

E Minister a enfatisa e importancia di intercambia conocemento y experiencia, respetando e realidad y responsabilidadnan di cada pais. Tambe el a expresa su aprecio p’e representantenan, e expertonan y miembronan di e gruponan di trabou cu durante e tres dianan anterior a prepara e encuentro Ministerial, como tambe pa tur esnan cu a contribui na organisacion di e evento na Aruba.

NOTHING NADA NIX18: un mensahe comparti pa proteha salud di hobennan

Un momento importante durante e programa di mainta tabata e presentacion di NOTHING NADA NIX18, un campaña desaroya den cooperacion entre e Ministerio di Salubridad, Bienestar y Deporte di Hulanda, e instancianan publico di Bonaire, Saba y Sint Eustatius, y e Ministerionan di Salubridad di Aruba, Corsou y Sint Maarten.

E campaña ta enfoca riba e importancia di preveni consumo di alcohol entre hobennan menor di 18 aña. Alcohol por afecta, entre otro, desaroyo di cerebro, concentracion y prestacion na scol di hobennan. Pa haci e mensahe accesibel y reconocibel pa e comunidadnan Caribense, e

campaña ta uza musica y mensahenan na Papiamento, Papiamentu, Hulandes y Ingles. E contenido y e presentacion ta adapta n’e contexto cultural y social di e islanan.

E iniciativa ta dirigi n’e mayornan, e hobennan y empresanan cu ta bende of sirbi alcohol. E meta ta pa aumenta conocemento tocante e riesgonan di consumo di alcohol na edad hoben y e importancia di proteha salud y futuro di nos hobennan.

Durante e presentacion, e Ministernan a haya oportunidad pa comparti nan opinion

tocante e iniciativa y e importancia di prevencion. Cu NOTHING NADA NIX18, e paisnan y islanan participante ta comparti un mensahe di prevencion: ningun alcohol pa hobennan menor di 18 aña.

Bo por gusta tambe

Adblock Detected

Please support us by disabling your AdBlocker extension from your browsers for our website.