Home » Arco Iris Kleuterschool a celebra Dia di Derecho di Mucha c’un Movie Night

Arco Iris Kleuterschool a celebra Dia di Derecho di Mucha c’un Movie Night

by Daniela

Arco Iris Kleuterschool a dedica un atardi special na su alumnonan pa conmemora Dia Internacional di Derecho di Mucha, cu un actividad diferente den cual e mayornan y mucha a disfruta hunto di un Movie Night.

Arco Iris Kleuterschool a celebra Dia Internacional di Derecho di Mucha cu un actividad special, unda e muchanan tabatin e oportunidad pa pasa un atardi diferente hunto cu nan mayornan. E evento, cu a tuma forma di un Movie Night, a transforma e patio di scol den un cine, unda e  famianan a prepara auto-seat creativo pa sinta y disfruta di un pelicula despues di bahada di solo.

Segun cabesante di scol, juffrouw Nelly, e celebracion ta parti di e compromiso cu e team di scol tin pa dedica atencion na e fecha importante aki. Tur aña, e scol ta organisa diferente actividad, manera Splash Day, pero e biaha aki a opta pa un experiencia nobo cu participacion directo di e mayornan.

Actualmente, Arco Iris Kleuterschool tin aproximadamente 176 alumno, un cantidad cu a baha compara cu e añanan anterior, ora cu e scol tabatin entre 240 alumno. Juffrouw Nelly a splica cu e decision pa organisa e actividad tabata basa riba e deseo pa pone e mucha completamente central y laga nan sinti cu nan ta e protagonista di e dia.

Durante e siman, e maestranan a trata e tema di derecho di mucha den klas, adapta n’e nivel di comprension di e alumnonan. Asina, e muchanan a haya oportunidad pa conoce nan derechonan di un manera cu ta coresponde cu nan edad. E Movie Night tabata e actividad cu a culmina e programa special.

Juffrouw Nelly tambe a expresa su gradicimento p’e creatividad y participacion di e mayornan, cu a coopera activamente pa haci e evento un exito. Segun Nelly, e colaboracion entre scol y famia ta algo cu ta observa durante henter aña, tambe den e charlanan y otro actividadnan. E participacion di e mayornan den bida escolar di nan yiunan ta contribui n’e resultadonan positivo y merece reconocemento.

Pa finalisa, e cabesante a comparti un mensahe pa tur mayor: Dia di Derecho di Mucha no mester keda limita na un fecha specifico, sino mester ta celebra tur dia. E ta recorda cu mucha ta un bendicion y cu e mayornan tin e responsabilidad pa trata nan cu respeto y cariño, duna nan e luga cu nan merece y brinda nan e educacion y amor necesario durante e etapa importante di nan bida.

Bo por gusta tambe

Adblock Detected

Please support us by disabling your AdBlocker extension from your browsers for our website.