Patricia Sanchez-Marchena ta mama di e victima di violacion sexual di diaranson manece diahuebs ultimo. Ainda e ta hopi conmovi, e ta hopi desapunta y e tin hopi rabia di kico a sosode cu su yiu muhe G.S di 24 aña di edad. Hendenan yega na nan cas y amigonan di famia a abusa di e confiansa y a abusa di su yiu. Esey a conduci cu e tata a dicidi di tuma ley den su man y a bay regla cuenta mesora cu e abusadonan.
Abogado mr. Olivia Sjiem Fat ta encarga cu defensa di e tata, Franklin Sanchez, awor sospechoso di e asesinato di e sospechoso di violacion sexual di su yiu muhe di 24 aña di edad.
Tur cos ta mustra cu dialuna awo, Franklin Sanchez, tata di e victima pero alabes sospechoso di asesinato di e sospechoso di violacion di su yiu muhe, lo presenta dilanti Hues Comisario pa duna cuenta di su acto. Ta premira cu lo prolonga su detencion mesora pa por sigui cu e investigacion, aunke el a admiti na Polis caba cu el a regla cuenta cu e violado di su yiu, pa e siña respeta dignidad di su famia.
E mama mes, Patricia Sanchez, tin hopi rabia, specialmente pasobra despues di nan trauma, ainda ta manda menasa contra su famia. El a sigura di no tin miedo y di lo defende su yiunan cu su mesun bida, si ta necesario.
