Hues ta obliga gobierno pa sigui paga huur di DTI

Un sentencia a cay pa loke ta trata huurmento di e edificio di DTI. Y tabata intersante pa tende di abogado Ronny Wix. Ta trata aki di un disputa cu a reina na momento cu gobernacion a cambia, caminda cu e minister di infrastructura, encarga cu DTI, a dicidi di pone un paro riba algo cu tabata canando ya pa hopi tempo caba.

Abogado Wix a splica cu ta trata aki di un caso cu a cuminsa na 2018. Su cliente a traha un edificio riba peticion di gobierno pa DTI nobo. Ta un proceso cu a cuminsa for di 2015 y a haci un inversion cantioso di hopi miyones di florin pa traha e edificio conforme e deseonan di gobierno.

Na 2017, e minister actual a bisa cu e no ta bay honra e acuerdo ey mas y el a purba stop DTI pa muda di e edificio bieu pa esun nobo y no kier a cumpli cu e contract.

Tabata tin un kortgeding aña pasa. Den e kortgeding, durante tratamendo di e caso cu no a bay bon pa gobierno, gobierno a dicidi di paga e huur y e tabata kier un bodemprocedure, esta un caso ordinario y a bay di acuerdo cu esey, pasobra nan a priminti cu nan lo cumpli cu e pago di huur.

Den e caso ey dos siman pasa hues a duna sentencia definitivo. E ponencianan di gobierno un pa un a wordo nenga door di hues.

E dolor di e minister

Abogado Wix no sa kico por ta e problema. E impresion cu a haya ta cu e argumentonan a wordo crea na e momento cu DTI mester a move, pasobra nunca tabata tin keho prome di parti di gobierno. Es mas, e trahadonan di DTI tabata hopi contento, e hefe di DTI mes tabata un persona cu tabata bayendo cu pensioen. E tabata contento cu e por a laga su trahadonan den un edificio moderno. Prome nan a bisa cu tin papia di afscheidsbeleid, cual ta e leerstuk cu tin ora cu gobierno cambia di mando, cu e gobierno bieu ta privilegia su hendenan of contrario.

Esey no ta e caso. Esaki ta un proyecto cu tabata canando pa hopi tempo. Nan a bisa cu tabata tin geschoemel cu bouwvergunning cu tampoco tabata berdad. Despues a bin cu un storia cu cosnan cu no tabata funciona den e edificio nobo, cual tampoco no tabata berdad.

A bisa hopi cos y hues no a bay di acuerdo cu ningun di e puntonan cu nan a bisa.

Wix no sa kico dolor di e minister ta.

 

Na 2017

Durante cambio di gobernacion e edificio tabata practicamente cla. Loke mester a wordo haci ta formalisa e contract y esey a formalisa. Ya tabata tin un trayecto di casi dos aña andando cu e edificio ta cla, e mashinnan tabata eyden. Hendenan di Hulanda a bin pa siña e empleadonan con pa traha cu e mashinnan, con pa midi. Tabata un proyecto cu tabata full cla, na momento cu e minister a dicidi cu e no kier a reconoce of honra e contract como un documento valido.

Wix a menciona cu e no sa kico e intencion di e minister tabata. Pero obviamente e no tabata kier pa nan a bay den e edificio nobo.

 

E sentencia

Wix a menciona cu e sentencia ta nifica cu pa cinco aña e cliente tin cu sigui mantene e edificio pa gobierno conforme e contract. Gobierno mester paga su huur tur luna y despues di cinco aña ta wak si por firma pa un periodo cu ta bay mas largo cu cinco aña. Gobierno ta pagando awor aki cu un poco dolor, no semper na tempo, pero ta pagando.

Apelacion?

Tur dos partido por apela, pero no ta necesario. Hues a duna e cliente di Wix rason riba tur punto. E minister por apela. Tecnicamente el a perde e caso. Si e tin base pa apela, si su abogadonan mes ta consehe. Wix no ta mira base pa apela.

E caso a bay poco straño, pero e caso no a bay na fabor di e minister por lo completo. Durante di e tratamento di e caso, e hues basicamente a bisa su abogadonan cu nan no tin caso y cu nan sa caba con e ta bay dicidi si e cos aki mester yega na un sentencia. E abogadonan e ora ey a bisa cu nan ta paga e huur, pero nan a pidi e otro partido pa coopera den un caso pa bodemprocedure, y a coopera cu esey voluntariamente. Pasobra nan a dicidi cu nan ta bay paga e huur. Esey ta tur loke e cliente tabata kier.