Den un forma di sorpresa a drenta un email awetardi copiando diferente colega encarga cu maneho na Serlimar, den cual e Vocero di e compania, Twyma van der Biezen, a anuncia cu entrante 9 di Augustus e no ta den servicio mas na Serlimar. Twyma van der Biezen tin algo mas cu un anja trahando como Marketing and Sales Manager. Minister Otmar Oduber a pone na Serlimar pa encarga su mes cu e parti di benta y mercadeo.. E tempo ey a hala Nathaly Wolff un banda y awe Wolff ta hinca den un pida espacio sin por traha pa loke el a studia pe.
Ta di e mesun forma a corta Lionel Croes tambe den pasado, ora e Minister y su satelitenan a bin cu yen di storia rond di esunnan trahando na Serlimar. Un campanja di redashi dunando e trahadonan un mal nomber.
Pero awor Twyma van der Biezen, nombra pa e mesun Minister Otmar Oduber, mes a dicidi di bandona su funcion. Trahadonan a conta nos cu na e oficina principal di Serlimar na Pos Chikito tabatin un discusion pisa entre Twyma van der Biezen y e Director. Esaki lo a sosode den oranan di mainta y pa atardi 3or e email a drenta.
E retiro inmediato aki ta bin na mal momento, precisamente awor cu mercadeo ta asina importante pa e compania, cu ta purbando di tur forma pa retene su clientenan, specialmente esunnan residencial. Ya caba a nota e forma profesional cu nan competencia ta hibando campanja relaciona cu servicio cu ta ofrece na clientenan. Mientras cu competencia a anuncia nan di 6000 cliente, Serlimar ta wardando keto bay riba barinan cu mester yega.
A yega dos container cu 1500 bari y a a haci un show di e yegada. E barinan aki no ta suficiente pa cumpli cu e campanja cu Serlimar ta hibando pa pasa cambia barinan cerca pueblo. Tur esakinan ta confirma e mal maneho di e director existente.
Twyma van der Biezen cu ta un trahado skerpi cu su mercadeo a haye den un ambiente cu na dado momento e no por traha aden. El a topa e mundo cruel caminda entre otro politica ta mete den e operacion diario di e compania. Fuentenan den Serlimar a sigura cu ta masha poco trahado por traha cu e Director nobo na Serlimar.
Di mainta pa atardi Twyma van der Biezen a tuma un decision drastico, confirmando cu ta trahando den un situacion di tension halto na Serlimar.
