Entre 2015 y 2020, e investigadonan di e Naturalis Biodiversity Center a adapta e lista di especie di vruminganan local di Hulanda Caribense. A documenta un cantidad grandi di especie nobo, incluso 40 especie nobo na Saba y 32 especienan nobo na Aruba. Comprondiendo e poblacion di vruminga di e islanan aki, ta pone nos un stap mas cerca di habri e complehidad di e ecosistemanan unico di Hulanda Caribense.
Vruminga ta sorto di animal social excepcionalmente compleho, a pesar cu nos ta topa nan casi tur dia, mayoria di biaha nan ta pasa nos atencion bay. E animalnan aki ta forma un sociedad complica cu ta cana paralelo na esun di ser humano. E colonianan ta funciona a base di un division di trabou y nan tin e habilidad di resolve problemanan compleho pa medio di comunicacion y trabou hunto den grupo. Tin mas cu 14.000 tipo di especie conoci mundialmente, pero te ainda tin hopi di siña tocante e habitante chikitinnan aki.
Recientemente, e investigadonan di e Centro di Bio-Diversidat di Naturalis a traha riba adaptacion di e lista di especienan di vruminga di Hulanda Caribense. A base di investigacion anterior conduci durante 1930 i 1970 dor di H.J. Mac Gilavry, P. Wagenaar Hummelinck i R.H. Cobben, a adapta e listanan aki pa di e forma aki incorpora e cambionan den e poblacion local di vruminga.
Pa medio di coleccion manual di e especienan, a colecta y surti e vruminganan pa por determina cada especie exactamente.
ISLARIBA
Prome cu inicio di e investigacion biologico mas recien, a documenta solamente dos especie di vruminga conoci na Saba. Pa medio di nan investigacion, Peter Boer & Marijn, J.A. Boer a documenta actualmente un total di 42 tipo di vruminga. Adicionalmente, pa medio di e mesun estudio, a documenta un conteo provisional di 24 y 56 especie di vruminga na St. Maarten y Statia respectivamente.
Interesante pa menciona ta cu a conduci e investigacionnan na Saba despues di e horcan Irma, ora cu palonan cu a cay, a obstaculisa e habilidad di e investigadonan pa por haya acceso na cierto parti di e rutanan y awasero pisa a conduci cierto tipo di vruminga na busca scondemento den profundidad di suela fuera di bista. Pa e motibo ey, e posibilidad ta existi cu por haya ainda un cantidad di especie di vruminga na Saba pero cu no a conta den e estudio aki.
Islanan ABC
A crea tambe un yabi di identificacion pa cubri e especienan descubri riba e islanan Aruba, Boneiro y Corsou. E yabi aki ta basa riba e mesun base di estudio di 1930 y 1970 y a suplementa esaki actualmente cu un investigacion di 2020 tocante e especienan na Aruba. Interesante ta cu a adapta e lista di especie cu anteriormente tabata na 12 especie conoci te na 44.
Di mas importancia
Comprondiendo e habitantenan local, tanto grandi como chikito, ta crucial pa diseña y implementa plannan di conservacion holistico. Documentacion di presencia di especie specifico di vruminga por yuda identifica si y ki ora cualke tipo di especie invasivo a yega. Vruminga ta hunga un papel vital den e ecosistema local y catalogando especie local ta simplemente e prome stap den comprendemento di nan importancia den mantencion di un medio ambiente sano y bon balansa.
E investigacion di e fauna di vruminga di Hulanda Caribense ta keto bay den progreso.
Pa siña conoce mas tocante diferente tipo di vruminga na Hulanda Caribense, bo por haya e lista di especie na e siguiente sitenan:
Lista di espesie pa SABA di total 42
Lista di espesie pa Kòrsou di 59 especie, di cua a registra 6 na Klein Kòrsou.
Lista di espesie pa Aruba di 44 especie total
Ademas un Yabi di identifikashon, di especie di vruminga riba e islanan ABC.
Foto’s
(1) Mier (Leptogenys pubiceps) Foto credit © Zach Lieberman/California Academy of Sciences- all rights reserved
(2) Mier (Odontomachus bauri) Foto credit © Michele Esposito/California Academy of Sciences- all rights reserved
