Durante rueda di prensa semanal di Fraccion di MEP dialuna mainta, Parlamentario drs. Shailiny Tromp-Lee a alerta comunidad riba e peliger real cu nos famianan ta enfrenta: E posibilidad grandi cu prijs di awa, coriente y muy probablemente gas tambe lo subi entrante comienso di 2027.
Segun e parlamentario, e costo di bida na Aruba ya caba ta hopi halto y ta pisa riba e poder di compra di e homber chikito.
Den e propio documentonan oficial, cu Minister Wever a comparti cu Parlamento, nos por a tuma nota cu WEB a adverti desde 1 di april 2026, cu na januari 2027 e proteccion di prijs di zeta (hedging) ta caba, y e costonan halto di produccion lo mester wordo pasa pa pueblo den forma di subida di tarifa. Banda di esaki, tin informacion circulando cu prijs di gas tambe lo bay subi na comienso di aña nobo.
Cuarentiseis dia prome cu aña nobo y ainda ningun trankilidad
Parlamentario Tromp-Lee a expresa su preocupacion sincero pa cu e tema aki. No obstante cu desde maart y april di e aña aki el a haci preguntanan por escrito na Minister mr. Geoffrey Wever, y a bolbe cuestiona esaki durante e reunion publico di presupuesto supletorio, ainda e mandatario no a brinda ningun claridad ni trankilidad door di presenta un plan of maneho concreto.
“Awe nos ta apenas 46 dia prome cu 1 di januari 2027 y nos hendenan no sa kico ta spera nan. Minister ta bisa cu e ta na mesa cu WEB y Elmar, pero e situacion aki no ta algo di ayera. Ta inaceptabel cu ta laga nos famianan drenta e temporada di fiesta nos dilanti cu e incertidumbre aki den nan cabes y den nan cartera,” Parlamentario Tromp-Lee a enfatisa.
E speransa ta riba tratamento di presupuesto 2027
Pa conclui, Parlamentario Shailiny Tromp-Lee a haci un yamada urgente na Minister mr. Geoffrey Wever durante e ultimo reunion publico. Ya cu te cu awe no a duna garantia, ta di spera cu durante tratamento di e presupuesto pa aña 2027 nos dilanti, Minister lo presenta un plan concreto, cla y transparente pa proteha nos pueblo contra un subida di awa, coriente y gas, y asina duna nos famianan e trankilidad y alivio cu nan merece.