Dialuna atardi ta bolbe scucha zonido duro di brake den e area di lagun. Ora tur hende bay tira bista, ta trata di un accidente na e mesun un crusada di Lagun, band’i oficina di sociale zaken, caminda dos vehiculo a bay dal fuertemente den otro.
Esaki a tuma luga den careda di 4:15 pm y caminda un biaha mas un di e vehiculonan a hera bay awa atrobe. Tabata trata di un Honda CRV y un Chevrolet Cruze. Segun por a compronde na sitio, e CRV riba caminda di preferencia a yega crusada y e Chevrolet for di su banda robes a sali su dilanti sin duna preferencia.
Afortunadamente e Honda no tabata riba velocidad halto pero na final no por a evita e impacto. Asina mes a bay dal basta duro den otro y a bay para net na e skina di e brug na nan man drechi.
Na prome instante, un di e ocupantenan a indica cu e ta bon y no mester di ambulance pero un rato despues, dolor a cuminsa lanta y a opta pa pidi asistencia di ambulance cu a presenta rapido na sitio. E tabata keha di dolor na bek, lomba y pecho. Manera nos grandinan ta bisa: “E brug ey tin algo cu ne”
