Awe mainta pa mas of menos 4:43 am polis a bay na Ruiz Take Away na Tanki Leendert debi cu un malhechor a drenta horta den e luga. E ladron a haci uzo di un martiu pa kibra e porta y drenta e luga. Den su intento el a purba bay cu caha di malta y refresco. E ladron no a logra hiba mucho cos debi cu personal di e compania di siguridad a actua rapidamente.
Ora cu e compania di siguridad a yega, e ladron a sali na careda y laga caha di malta atras. Poco mas leu el a laga su bais y otro caha di malta benta den mondi. E doño di e luga tambe a yega na e sitio pa pone su mes na altura di e susedido.
“Algo fastioso mainta trempan asina ki”, tabata palabra di e doño. Esaki no ta prome biaha cu e truck di cuminda ta hay’e den noticia. Dia 22 di maart ultimo tambe algun atracado a pasa na Well Done Truck y un rato despues a yega Ruiz Take Away, net ora nan ta cerando y a horta 100 florin efectivo. E dia ey e ladronnan a perde den e mondi eytras cu ta sali na Sero Patrishi. Den marduga polis a detene algun sospechoso, relaciona cu e dos atraconan arma aki. No ta conoci si ta e mesun grupo ta afo atrobe y ta purba horta e negoshi of si ta otro ladronnan ta envolvi. Hecho ta cu awo e ladron a keda sin e maltanan y sin su bais!
