Esaki ta loke e Secretario di Estado di Asuntonan di Reino Raymond Knops a bisa despues di su bishita di dos dia na Aruba den un entrevista cu Sharina Henriquez di Caribisch Netwerk.
Di loke Knops a expresa por a compronde cu e ayudo social cu su ministerio ta brinda na organisacionnan manera Cruz Cora na Aruba, no ta pa eternidad. E ayudo aki cu a cuminsa mita di 2020 no ta bay sosode mas despues di memey di e aña’ki. Aruba lo mester bay percura pa e hendenan cu ta pasando den problema social social, cu no por pone cuminda riba mesa, y tambe pa esnan cu ta haya FASE aworaki.
El a menciona cu e cantidad di hendenan cu ta depende di e ayudo pa cuminda ta hopi grandi. “Ta yega momento cu Aruba mester percura pa e hendenan aki”. Su palabranan a zona manera un critica, pasobra a bisa cu ta bay un aña leu y ainda e cantidad di hende cu mester di ayudo a keda mescos. Pero na mesun momento el a bisa cu tin palabracion cu gobierno di Aruba cu esaki mester bay sosode.
Hulanda ta brinda e ayudo aki na Cruz Cora, cu ta esun cu ta distribui cuminda pero tambe vouchernan pa esnan cu no tin entrada haci compras. A parti miles di voucher cu cual a yuda rond di 20 mil persona mientras cu den henter e temporada aki di coronavirus a parti 75 mil cuminda cayente. E problema ta cu un gran parti di e hendenan aki ta personanan sin status legal riba e isla.
A papia cu gobierno cu den e temponan dificil aki no por haci uzo di stranhero. Y mester haci algo pa evita cu ilegalnan ta traha. Di otro banda mester tin un forma pa atende cu esnan cu no tin nada. Solucion Hulanda kier mira di Aruba.
