Diasabra dia 24 di october 2020 a tuma luga e actividad di Kiwanis Club of Palm Beach na ocasion di Kiwanis One Day 2020. Kiwanis One Day ta un iniciativa di Kiwanis International pa demostra kico tur por logra cu trabao boluntario den un solo dia.
Den e caso aki Kiwanis Club of Palm Beach a opta pa haci dos actividad comunitario, ambos di nan teniendo cuenta cu protocolnan vigente di COVID-19.
E prome actividad tabata un actividad di aprecio pa e trahadonan di Departamento di Salud Publico (DVG) kendenan ta forma parti di e liñanan di asistencia durante e maneho di e crisis di COVID-19. E actividad a encera un cooperacion entre Journey Breakfast (www.journeyaruba.com) y Kiwanis Club of Palm Beach pa entrega di un desayuno special na 60 trahado di Departamento di Salud Publico. Journey Breakfast a sponsor e actividad aki, dunando e desayunonan na descuento y aportando cu e labor di entrega. Un comision di miembro di Kiwanis Club of Palm Beach a compaña nan consistendo di Presidente Sr. Richard Roy, Distinguished Past President Sr. Evan Giel, Vice Presidente Sr. Rothmar Coenraad y Distinguished Past President & Luitenant Governor Sr. Patrick Melchiors. E trahadonan di DVG a expresa nan gratidud pa e aprecio aki.
E segundo actividad tabata un ‘beach clean up’ den e bahia di Playa na Surfside, Oranjestad. A cubri e area for di e Surfside Beach Bar te na e Cas Ceremonial di Gobernador. E boluntarionan aki a consisti di e miembrecia di e Club, y den cual un gran mayoria compaña pa un miembro di famia. Mester menciona cu durante di henter e evento e boluntarionan aki a mantene nan mes na e protocolnan di DVG, pues a uza tapaboca y a mantene distancia social di 1.5m na tur momento. A conta cu aporte di e sponsor EcoTec cu a percura pa dos (2) container di 20 yarda pa recoge e sushinan. Mester menciona cu e area di e beach a keda limpi, cual ta importante pa nos turismo, nos comunidad y nos medio ambiente, specialmente pa evita cu sushi por impacta e bida marino di un forma negativo. E area aki ta importante pa Kiwanis Club of Palm Beach, mirando cu nan centro di actividad ta keda ubica na Neptali Henriquez Park cu ta den e area aki.
Kiwanis Club of Palm Beach Aruba a keda sumamente satisfecho cu e actividadnan di e dia menciona. Riba e portrenan adhuntu por mira e actividad boluntario riba e beach y e entrega di e desayunonan. E entrega di e desayunonan na trahadonan di DVG tabata un di e prome iniciativanan di e Club pa duna bek na esnan cu ta dunando hopi durante e crisis actual di COVID-19.
Kiwanis Club of Palm Beach Aruba kier a haci uzo di e oportunidad aki pa gradici tur esnan cu den un forma of otro a sa di contribui na Kiwanis One Day, y en especial e sponsornan EcoTec pa e containernan di sushi, Eagle Aruba pa e T-Shirts y Journey Breakfast pa e desayunonan. Nan aporte na e actividadnan ta altamente aprecia.
Kiwanis Palm Beach ta pertenece na e organizacion global Kiwanis Internacional cu ta un instancia caritativo dedica na haci nos mundo miho door di cambia un comunidad pa medio di un mucha cada bes. Mas informacion por haya riba: www.facebook.com/kiwanispalmbeacharuba
