Si bo mishi cu bandera di un pais, bo ta mishi cu alma di un pueblo. Si bo mishi cu alma di pueblo, bo no por tin pretencion como minister of parlamentario individual, ni tampoco den constalacion di Parlamento, di pensa cu bo tin autoridad di mishi cu esaki, sin cu bo ta consulta cu e pueblo adecuadamente. Ta palabranan cu a trece den Staten. Ta palabranan cu a ripiti pa e tempo eynan na minister Otmar Oduber, kende ta forma parti di e coalicion actual. Segun minister actual di cultura, Xiomara Ruiz-Maduro, nan no a lubida e palabranan eynan. Pesey sigur en conexion cu dia 18 di Maart, cu ta biniendo, nos fiesta nacional y como minister di cultura, mas cu claro, kier pa e informacion bin dilanti, di na momento cu esaki a cuminsa eynan cu Betico, te awor aki, pa pueblo por ta informa di e proceso y mas cu claro, e ta na su luga pa e cambio aki wordo haci. Pero e cambio aki wordo haci cu un referendum, caminda cu e pueblo adecuadamente ta wordo informa. Ora cu bisa referendum, e referendum no por yega for di awo pa dia 18 di Maart. E no ta realistico. Loke si ta realistico, cu ya caba den e proceso, bayendo na e luna di e celebracion di locual ta nos bandera, informa pueblo pa nan ta adecuadamente informa pa asina e ora ey nan por forma un opinion y tuma un decision. E ta algo cu tin cu papia riba dje.
No ta Ruiz-Maduro so ta den gobierno awor aki, nan ta den un coalicion y ta respeta esey. Ta respeta e decision cu ta bin den ministerraad, pero sigur como minister di cultura, lo trece dilanti. Na momento cu ta mishi cu un bandera di un pueblo, bo ta mishi cu e alma di e pueblo ey y p’esey bo no por tin e pretencion di como minister, ni den grupo, parlamentario individual, ni den grupo, dicidi riba dje, sin cu e pueblo ta duna su opinion riba dje.
Esey lo bay bira e discusion pa loke ta bandera di Aruba. Un discusion cu tin cu hiba, pero un discusion cu tin cu hiba bon informa. No solamente a base di emocion, pero muy en particular, caminda cu ta saca e informacionnan di locual cu tin den archivonan nacional y ta bin y ta papia tambe cu esnan cu te ainda Dios a duna nan bida, y cu tabata presente den e comision ey, pa nan tambe trece dilanti, con e bandera aki a yega y ki paso tin cu tuma y na fin di dia, pueblo di Aruba, tuma un decision. Den e caso aki ta propone un referendum, pa asina di un of manera of otro, pa semper dicidi cu pueblo di Aruba, esaki ta nos bandera y nunca mas den historia, lo bin un discusion si esaki ta e color of esaki no ta e color.
