Ora bo baby ta rond di 8 luna elo cuminsa mustra su tristesa ora e hendenan pega na dje no ta den su cercania mas. E miedo di separacion aki ta mas fuerte ora e baby ta entre 8 pa 18 luna. E ta wak bo bai, pero ainda e no sa si, of ki ora bo ta bolbe. Abo ta esun cu ta pone sinti sigur y diripiente e siguridad cu bo ta dun’e ta cai afo. Esaki por crea un reaccion hopi fuerte cerca dje.
Ora bo yiu ripara cu bo a desparce, e ta cuminsa yora. E no kier bai creche mas of no kier drumi su so mas. Por pasa cu den anochi e ta lanta y ta cuminsa yora.
Tur mucha ta sinti e miedo di separacion, pero tur mucha ta reacciona na un diferente manera. Un lo reacciona mas fuerte cu e otro. E fase aki ta parti di e crecemento y desaroyo di un mucha y cu eventualmente lo pasa. Pero e tempo cu ta tuma pa pasa door di e fase aki ta varia pa cada mucha. Un mucha por tuma mas tempo cu un otro. Un mucha por hasta keda te ora e mucha tin 3 aña.
- Mucha cu un edad di mas o menos 2½ aña por sintie bastante sigur den presencia di “hende straño.”
- Ta tuma mas tempo pa un mucha mas chikito custumbra cu un hende cu e no conoce mucho bon.
- Rond di 4 aña, un mucha lo por anda mas mihor cu separacion cortico for di su mayornan. Su alrederor ta bira mas conoci p’e, e por yuda su mes mas mihor y por papia mas mihor.
Na cas
Na cas, e miedo di seperacion por bira menos. Esaki ta pasa ora e mayor ta fisicamente presente na cas, pero no ta den e mesun camber cu e yiu. Por ehempel: E yiu ta den su camber pero e mayor ta den cushina. E yiu por tend’e ta move rond, canta, cushina, etc. E ta sinti cu toch tin hende den su cercania.
No haci cherche di su miedo. E mester di bo sosten y di otronan den famia pa pasa bon den e fase normal aki.
Tip: Por hunga e wega di “Kiekeboe” cune pa yud’e comprende cu ora e no wak bo, toch bo tey y cu bo ta bolbe.
Na creche of cerca e babysitter
Ta importante como mayor pa no agrega na e miedo di separacion cu bo yiu ta experencia. Hasta si bo yiu ta experenciando miedo di seperacion, purba di keda cu un curason trankil ora bo lag’e na creche of cu e babysitter.
- Purba despedi na un forma cla. Aunke e ta chikito ta bon pa bo bis’e unda bo ta bai y cu bo ta bin bek mas laat.
- Despedi na un manera sigur y cu confiansa. No keda draai rond ora di bisa ayo. Aunke bo ta sinti bo tristo, bo yiu mester wak y sinti bo confiansa pa e por anda cu e despedida.
- Dun’e un caricia y un brasa grandi y si e por, lag’e duna bo uno tambe. Esakinan ta consuelo pa boso tur dos. Porbablemente bo yiu lo stop di yora un rato despues cu bo a bay.
TIP: Un sugerencia ora bo laga bo yiu cu un babysitter: E prome biaha, laga bo yiu un rato so. Cada biaha bo laga bo yiu cu e babysitter, bo por lag’e un poco mas largo cu e biaha prome. Asina bo yiu por siña paso pa paso pa anda cu e separacion.
Fuente pa articulo; “Mijn kindje is 8 maanden en huilt enorm als ik hem achterlaat in de opvang”- KindenGezin. Pa informacion riba educacion por acerca Fundacion Pa Nos Muchanan, Cumana 2, tel. 5834247 / 5880856, e-meil: [email protected] ,website: www.fpnm.aw
