E lam ta guia e ciego – politica cu LNG na Aruba

WEB Aruba NV (WEB) ta trahando desde 2018 cu un team local y internacional di profesionalnan y experto cu e meta di haci un estudio di factibilidad (haalbaarheidsstudie) comprensivo y un proceso di destaho (aanbestedingsproces) pa por logra adkiri gas natural likido (LNG) na Aruba como combustibel na e prijs mas abou posibel. Esaki no ta un secreto.

WEB a duna den 2018 y 2019 un gran cantidad di sesionnan informativo cu presentacionnan na Gobierno, Utilities Aruba NV, Hunta di Comisarionan, instancianan gubernamental, NGO’s y na e publico Arubano en general.

Den e presentacionnan publico aki WEB a duna un splicacion habri y transparente di WEB su intencionnan pa futuro di loke ta trata e cambio pa LNG manera combustibel primario. E cambio di ‘Heavy Fuel Oil’ (HFO) pa LNG ta un proceso cu ta tecnicamente, comercialmente, y huridicamente compleho y cu ta tuma su debido tempo pa Aruba y WEB por logra e miho resultado posibel.

Den e sesionnan di informacion WEB a laga sa claramente cu e estudio di factibilidad y e proceso di destaho LNG no tin nada di haci cu e empresa GasUnie. Cu sr. Marlon Sneek (lider di fraccion di e partido den oposicion, AVP) ta bin trece informacion (hopi) bieu dilanti y cu Gobierno kier publicamente contradeci sr. Sneek, no ta rason pa ambos partido trece publicamente informacion eroneo pa motibonan politico. Aki ta parce un cos manera cu ‘e lam ta guia e ciego’; tin cu puntra sr. Sneek y Gobierno kende precies ta e ‘lam’ y kende ta e ‘ciego’.

Ta sumamente evidente cu e gobierno actual ta bou di un presion enorme pa produci den corto tempo algo di substancia pa asina por bende pueblo manera un cos cu Gobierno a logra ‘algo’ di balor pa nos pueblo den e ultimo tres-y-un-cuarto aña. Tin e indicacion fuerte cu Gobierno ta confia cu e empresa di gas EAGLE-LNG lo haci e milagro aki realidad. Un REOI no ta un destaho competitivo (dus cu mas cu un proveedor cu tin cu tene nan mes na e mesun reglanan). Un REOI ta simplemente un “Expression of Interest” (un ‘expresion di interes’ y nada mas).

Shonnan, un materia compleho manera un cambio tecnico-contractual pa LNG como combustibel primario no ta keda cla den 6 luna di tempo (manera cu Gobierno ta laga kere). Pa core cabes di gay y bula na awa cu e prome y unico proveedor di LNG cu bati na porta y cu ta priminti cielo y tera pa locual ta benta di LNG pa Aruba, ta un ‘salto mortal’ cu por tin consecuencianan negativo pa e futuro di tarifanan di awa y coriente cu pueblo por afford. Specialmente e aspectonan contractual y huridico di compra y benta di LNG, si no investiga esakinan bon y cu cuidado, por ta pesta di ‘pitfalls’ tecnico, huridico, y contractual cu por costa pueblo basta mas extra placa den futuro.

Ami no ta politico y preferiblemente mi no ta mete mi mes cu politica. Pero ora politica ta tira santo den wowo di pueblo riba e tereno di LNG, e ora un persona cu cierto conocemento di e materia di LNG mester interveni y pone cos drechi.

Ta publicamente conoci cu WEB ta bezig desde 2018 cu un estudio di factibilidad y proceso di destaho di LNG cu ta profesionalmente hinca den otro. E proceso di WEB-LNG ta bon na caminda, transparente, un destaho competitivo, maneha integralmente, y cu e meta pa logra haya LNG na Aruba na e prijs di mas abou posibel.

E mundo di LNG ta un specialismo. Ambos, bende y cumpra LNG, tin su complexidadnan tecnico, comercial, y huridico. Cambio di e combustibel primario pa produci electricidad pa pueblo di Aruba no ta un wega politico. Aki no por zomaar ‘effe snel tekenen bij het kruisje’.

Ir. Richard A. Frank (Un ciudadano Arubano cu conocemento rasonabel di e mundo di LNG y cu ta preocupa pa e futuro energetico di Aruba).