Dialuna ultimo 17 di augustus 2020 a tuma lugar e graduation y research presentation di Keyla Reeder caminda e la presenta su Bachelor thesis titula “E rol di famia den reintegration di patient nan di Respaldo”. Keyla a completa su ultimo stage exitositamente na Respaldo. E thesis aki siguramente ta un fundeshi pa mas estudio den futuro tanto na Aruba como cu den caribe ariba e tereno di salud mental y e rol cu famianan ta hunga den e proceso y tratamento di pashentnan cu un malesa psikiatrico of mental.
Na juli 2019 Keyla a ricibi un scholarship di Universidad di Amsterdam pa asina forma parti den un summer school program titula A Peaceful Mind: Mindfulness and Compassion-based Interventions. Den su 4 aña nan na Universidad di Aruba, Keyla a completa su stagenan na Centro di Memoria, Sociaal Psychiatrische Dienst (SPD) y na Respaldo. Siguramente su pasion y interes pa e area di salud mental tawata visibel durante su trayectoria y estudio na Universidad di Aruba. Apesar di e temponan dificil y insigur cu e pandemia di e COVID-19 a trece cune, Keyla a logra completa su thesis y asina gradua oficialmente como un Trahador Social cu un total di 272 ECTs.
Keyla ta un graduado di Colegio EPI Hospitality & Tourism, y despues di a traha 2 aña den e departamento di Recurso Humano, e la haya e inspiracion pa continua su estudio den e ramo di trahador social pa asina por brinda e sosten y ayudo necesario na tur persona. Actualmente Keyla ta den proceso pa cuminsa su pre-master na e Universidad di Utrecht caminda e lo sigi si estudio di Masters den Clinical Child, Families and Education Studies (orthopedagogiek). Den futuro Keyla ta spera di por sigi contribui den e ramo di salud mental y research. Palabranan di danki ta bai na cada un persona cu a duna nan tempo, sosten yaporte den e proceso di realisa e thesis aki.
