Diahuebs a tuma luga e asina yama Ora Loca den Santa Cruz cu ta organisa pa Don Flip Carnival Team. E tabata un parada chikito, pero sigur yena di ambiente, caminda grandi y chikito a disfruta. El a sali for di Stadion Crismo Angela/Nadi Croes y bay direccion nort. E parada a termina na Weng Kee Supermarket.
A nota presencia di Prins y Pancho Hubenil, Reina Hubenil di Aruba su Carnaval, Jennely Winklaar, 1st Runner-up Hubenil, Shiki Asencion, Reina Infantil di Aruba su Carnaval, Ziah-Amalia Salomon, como tambe Sra. Carnaval 2023, Geraldine Albertsz.
Joy Werleman, organisado di Ora Loca, a expresa cu e parada di blaas tabata fenomenal y awo a pone e parada den Santa Cruz. A celebra 50 aña di Don Flip Racing. Nan a gana e ora loca manera debe ser. E pandemia a pasa, pero e hendenan a respond’e. Banda a pone ambiente, hende na banda, incluso e organisadonan a pone un last lap pa Aruba celebra 50 aña di Don Flip Racing. Pa otro aña e lo bira mas grandi, ya cu nan tin plan mas grandi.
Rosmery Rondón, docente di EPI, a expresa di tabata pasa un momento tremendo durante e parada di Santa Cruz. El a indica di a disfruta henter e proceso. Incluso el a gusta tur cos.
Jennely Winklaar, Reina Hubenil 69, a indica cu e ta gosando hopi. Te ainda tur cos ta bayendo bon y no tabatin ningun problema, y e ta gosando sanamente. E mensahe cu el a manda pa un y tur tabata pa corda cu carnaval ta un celebracion, y pa celebr’e sin discusion.
Haydy Boekhoudt, representante di SMAC, a indica cu e tabata hopi asombroso cu SMAC por a forma parti di e parada y yuda e organisadonan guia e ora loca. Di mira e iniciativa cu nan tin, e participantenan di bario, e ta hopi great pa mira nan y ta hinca mas tempo pa engrandece carnaval. E parada tabata mas chikito compara cu aña anterior, pero despues di dos aña tur cos ta tuma su tempo pa lanta bek.
Boekhoudt a indica di mira esaki, e cantidad di hende cu tin, e parada ta poco chikito pero ta kere cu ora mira cos bira normal pa otro aña tin grupo mas grandi ora. Tambe e tabata sorprendi di mira cantidad di hende para banda di caminda durante e parada di Santa Cruz.
