JetBlue a anuncia su uniform standard nobo cu ta conta cu un diseño moderno y completamente blauw y emblematico den su rol como un marca innovativo cu ta revoluciona e industria y cu su clientenan ta encanta y tin confiansa pa biaha. Desde patronchi colorido na su rabo, JetBlue semper a uza diseño personalisa pa duna honor na e hendenan, e luganan of e asociacionnan cu forma parti di su ‘DNA’.
E “icon in the sky” nobo ta brinda JetBlue un diseño visual cu destaca mientras e ta expande na e mercadonan nobo y ta trece oferta basa riba e clientenan den tur e industrianan di biahe.
E prome avion cu a haya e “look” nobo ta e Airbus A321 cu Mint®, cu ta hiba e nomber di “A Defining MoMint” y a cuminsa duna servicio dia 15 di juni. JetBlue tin plan pa actualisa tur su avionnan cu e standard actual.
Ta den e cuadro ey mes diasabra ultimo e prome avion a yega Aruba atardi procedente for di aeropuerto John F. Kennedy di New York. Siendo e di dos aerolinea cu ta trece mas pasahero Aruba despues di American Airlines, diariamente JetBlue ta baha na nos aeropuerto for di diferente destinacion. Pero, ora e avion aki a baha, mesora el a hala atencion pasobra e modelo tabata completamente diferente na esun regular.
“E uniformidad semper tabata parti di nos identidad. Na momento cu mira un avion di JetBlue, sea ta na tera of den aire, nos kier pa e clientenan por reconoce nos como un marca di biahe cu ta transporta nan di un manera diferente compara cu e otronan”, asina Jayne O’Brien, head of marketing and loyalty di JetBlue a menciona. “E uniformidad nobo ta yuda nos destaca den un shelo yena cu e aerolineanan tradicional y ta un refleho impresionante di nos rol como un aerolinea cu tin un combinacion di prijs abou y un tremendo servicio.”
E diseño nobo ta basa riba e legado y personalidad unico di JetBlue cu e elementonan preferi y energico pa un era nobo manera:
- Un blauw cu ta combina cu e color di e compania
- Patronchi iconico riba e rabo di avion cu awo ta energico y extendi pa brasa e body y bariga di e avion
- Un logo di JetBlue mas grandi pa representa e impacto cu e avionnan aki ta causa den e industria
- Winglets colorido cu ta agrega un toke extra di diversion cu un palet di color nobo
- E patronchi di e avion y e logo di JetBlue cu tin riba e bariga, ta hacie notabel for di e prome instante
E prome diseño pa e avion A321 cu Mint, tin e patronchi di Mint Leaves di JetBlue na su exterior pa prome biaha, esaki ta permiti cu e clientenan como tambe e miembronan di e tripulacion por identific’e facilmente. E avion completo di JetBlue lo ricibi diseño nobo cu patronchinan renoba y un set mas amplio di color.
Ademas di e cambionan emocionante den su exterior, anteriormente JetBlue a realisa varios cambio den e interior di e avion pa brinda su clientenan un experiencia di biahe mas comodo y personalisa. JetBlue ta ofrece un producto util y lider den e industria for di complimentary seatback entertainment te na high-speed Fly-Fi® broadband internet gratis.
E elementonan briyante y colorido cu ta aparece den e diseño nobo di uniformidad tambe ta aparece den e identidad di marca visual di JetBlue lansa den e e plataformanan social na cuminsamento di aña. E diseño nobo ta e prome actualisacion completo di JetBlue su diseño di pintura. E clientenan por spera di mira mas di e diseñonan aki cu refreshed tailfin pa fin di aña.
JETBLUE NA ARUBA
Tabata riba un 15 di september, pero na aña 2006, cu e aerolinea JetBlue a start operacion na Aruba, cu varios vuelo diario, for di John F. Kennedy International Airport (JFK), cu ta su base na New York. Di biaha despues di esey na 2007 a lansa servicio semanal for di Boston (BOS), cu despues a bira servicio diario. Bo ta corda e dia special na 2014 ora cu JetBlue a trece Aruba su di 1 miyon pasahero pa e aña ey pa Aruba? Na januari 2017, JetBlue a agrega servicio for di Fort Lauderdale (FLL) y na november 2020, a agrega su ultimo destinacion cu ta Newark (EWR).
E network actual di JetBlue for di e area ‘northeast’ y ‘south’ for di Merca pa Aruba ta un testamento di JetBlue su confiansa continuo den e destinacion. Pa varios aña JetBlue tabata e “carrier” mas grandi di AUA Airport, cu un market share di 27% di tur buelo cu ta sali for di Aruba. AUA Airport su partnership cu JetBlue ta hopi valioso y a crece fuerte y resiliente, specialmente durante e temponan dificil tras di lomba. Danki na e partnership fuerte crea den e ultimo 17 añanan, AUA Airport tin e confiansa cu AUA Airport lo sigui gosa di un relacion fructifero cu JetBlue pa hopi aña mas.
TOCANTE JETBLUE
A funda JetBlue na augustus 1998, pues apenas 24 aña pasa, pero a cuminsa bula 23 aña pasa, dia 11 di februari 2000. E aerolinea ta conta awendia cu 287 avion, bulando riba 1000 vuelo pa dia pa 104 destinacion rond mundo. E destinacionnan ta varia den Merca, Canada, Mexico, Caribe, Centro America, Sur America y sin lubida Europa. Dos aña pasa el a conta riba 22.000 empleado den servicio directo di e compania. Su ciudadnan principal cu e ta sirbi mas ta Boston, Fort Lauderdale, Los Angeles, New York, Orlando y San Juan. Su programa pa pasahero frecuente yama TrueBlue. Nan ta un miembro activo di OneWorld, SkyTeam y Star Alliance.
