Riba insistencia di prensa, Prome Minister Evelyn Wever-Croes a declara cu e mes ta sumamente sorprendi cu su colega Minister Ursell Arends a cuminsa un caso contra su mesun gobierno y pues contra su mes! “Mi no ta compronde e strategia di e abogado cu a propone esaki, cu ta algo huridicamente incorecto. Mi a pidi colega Minister Ursell Arends pa un splicacion kico a bay fout aki y mi ta pendiente di esaki. E ta un eror grave y esnan responsabel mester carga nan responsabilidad. Pasobra e accion aki por causa daño na e credibilidad di henter nos Gobierno siendo cu demas minister no tin arte ni parte den esaki. Nos ta un Gobierno serio, mi a lidera nos Gobierno durante e pio pandemia cu nos pais a pasa aden y na forma responsabel y exitoso. Locual a pasa diabierna cu e caso entama pa Aruba Birdlife Conservation, ta atacha e imagen di Gobierno y esey mi no ta acepta. Minister Ursell Arends ta trahando pa coregi e eror y e mes lo duna mas splicacion di kico a bay fout. Pues no ta trata aki di problema entre un minister y e resto di su gobierno; ta simplemente un eror”, segun e prome mandatario di nos pais.
Pa loke ta trata e caso mes di Embassy Suites, Prome Minister a indica cu Embassy Hotel ta un proyecto di varios gobernacion y cu e mes a yega y haya e proyecto cla. Ta un hotel cu ta duna empleo na hopi mama y tata di famia local. Nan a haci un peticion pa por drecha e beach y nan a haya promesa di ministernan anterior, referiendo na Minister Otmar Oduber den e mesun Gabinete Wever-Croes I. Departamento di Infrastructura y Planificacion (DIP) a otorga e ‘aanlegvergunning’ pa nan drecha e beach completamente den cuadro di ley y teniendo na cuenta e consehonan di demas departamento y hasta a inclui e recomendacionnan di Directie Natuur en Milieu (DNM) como condicion den e aanlegvergunning.
Segun Minister Ursell Arends y DNM, cu a resulta despues cu e hotel lo a viola e permiso otorga. A base di rapport di DNM ta evaluando si esaki ta e caso of no y ki paso mester tuma al respecto. Mester menciona cu Natura Development ta nenga esaki rotundamente pasobra DNM tabata den tur reunion y tabata na e sitio di construccion dialuna y a confirma cu tur cos ta cana bon. Mas bien “forsanan di afo” cu tin influencia riba e minister a activa y pone e minister den un posicion fastioso, cu a hinca henter gobierno den un impasse awo.
Prome Minister ta reitera cu desaroyo economico ta importante pa nos pais por recupera y den esaki mester busca un balans entre desaroyo y naturalesa. Gobierno di Aruba ta aprecia e interes di inversionistanan local y stranhero. Aruba tin un sistema legal hopi solido y como tal mester cumpli cu permiso y condicionnan. Den e caso aki no ta diferente. E departamentonan di Gobierno ta haciendo nan maximo esfuerso pa resolve e situacion mas pronto cu ta posibel.
Y si e caso sigui?
E reto awor ta cu si e caso sumario continua den corte, lo nifica un kiebro grandi den e relacion entre MEP y RAIZ, pasobra e Minister di Naturalesa lo mester ataca y verf su colega di infrastructura (alabes minister-president) preto den e proceso. Tur esaki pa mustra comosifuera cu DIP y DOW a comete un eror door di honra un permiso pidi na 2016 y duna na 2019 caba door di e mesun gobierno di MEP-POR-RED, siendo cu tur conseho di Departamento di Naturalesa y Medio Ambiente (DNM) mes ta positivo. Ta sinti cu Raiz awor ta defende interes di Aruba Birdlife Conservation (ABC) di Greg Peterson, en bes di goberna como un gobierno completo y pone interes general riba interes particular di un fundacion of di un palanca di partido. Si lesa e tono cu minister-president ta referi na abogado mr. Geert Rep den e articulo mas ariba, ta mustra claramente cu e chens cu Rep por keda representa gobierno den casonan tambe ta mustra masha “scur”.
Cu e caso aki awor ta demostra un maneho no-integro, ora cu Minister Ursell Arends ta uza e mesun abogado di ABC pa bringa su mesun Gobierno y e inverionistanan di Natura Developments, djis pa duna ABC acceso na e file completo pa por bringa e mesun gobierno. Mester tene na cuenta cu den e caso aki Gobierno di Aruba forma pa MEP y RAIZ ta para bandabanda di e caso, loke no por! Di un banda Gobierno (Raiz) awor ta hunto cu ABC contra Natura Development y Gobierno (MEP) den e mesun caso aki. Ta bisa Raiz pasobra ta e Minister di Naturalesa (Raiz) ta demandando e Minister di Infrastructura (MEP) awo, siendo cu den nos leynan ta papia claramente di “Homogeniteit” entre e ministernan, pa tin un maneho uniform.
