Jeannette Richardson Baars durante entrevista a splica un tiki riba e sesion di informacion rond di trafico humano. Tur aña rond di e dia nacional contra traficacion di hende, cu ta dia 18 di October, ta organisa algo. Nan ta e Taskforce contra traficacion di hende. E aña aki atrobe a haya Shamere Mckenzie, kende ta conoci for di hopi aña cu su mes tabata victima di traficacion.
Dicon ta bin cun’e?
E por conta un storia cu ta bay den e detayenan kico ta e riesgonan pa hende, muchanan hoben, pero hende grandi tambe, ta bira victima di traficacion. Tin diferente forma di traficacion. Esun aki ta explotacion di hende. Pone un hende den un posicion di slavitud. E no tin libertad, e no por haci loke cu e kier. E mester entrega su placa, papelnan, etc. E ta bay conta riba esey.
Banda di KPA, cu ta bay haya e training tambe, a haya e cooperacion di diferente hotel pa tambe papia cu nan. Mester habri wowo pa traficacion di hende y e hendenan di hotel tambe por ta nan wowo pa wak ken por ta un victima di traficacion. E por ta un hende na balie, ora nan ta registra, cu ta bisa cu tin algo straño. Un homber bieu cu diferente muhe hoben, cu ta registra cu ta un tiki straño. Por ta cu un persona ta keda den un hotel y no ta habri porta pa housekeeping. E por ta housekeeping mes ta haya condomnan den un camber cu ta un tiki fuera di normal of standard. Esey por ta un indicacion cu algo ta sosodiendo. No mester ta traficacion necesariamente, pero e por ta si. Nan ta contento cu nan ta prome den Caribe cu ta haci e cooperacion aki cu hotelnan pa train nan hendenan tambe pa ta wowo riba caya. Pa nan wak kico lo por ta casonan di traficacion. Importante ta pa duna informacion, pa polis por cuminsa cu un investigacion.
Cruz Cora
Riba e parti di Cruz Cora tambe tur hende sa cu tin desaster cu a tuma luga den nos region. St. Maarten mas tanto cu ta conecta cu nos na Aruba. Tin mucha cu ta bin aki for di St. Maarten pa sigui nan les na scol. Den esey tambe tin un wowo riba dje pa wak si esey no ta hendenan cu lo por bira victima di traficacion. Den pasado casonan di muchanan di Haiti si a wordo trafica. Kier bisa e hendenan di Cruz Cora tambe, ora nan ta aki of ora nan ta bay den exterior, na momentonan di desaster pa ta wowo. Wak kico ta pasando pa preveni cu muchanan por bira victimanan di traficacion. Ta hopi bon cu den diferente dia, ta duna tur e hendenan aki informacion riba traficacion.
Informacion
Max Wernet y sra. Richardson-Baars lo duna e parti general, di parti di e Taskforce. Shamere Mckenzie tambe ta un studiante riba su mes y e lo conta e storia kico a pasa cun’e. Ta informa e studiantenan di Colegio riba un dia over di e risiconan ora nan bay den exterior pa studia cu nan por topa cu hende cu ta mustra bon, cu ta mustra manera na cas, cu ta papia Papiamento of loke sea. Pero por ta cu tin un riesgo den esey tambe, pasobra bo no tin bo mama, bo tata, of resto di famia hunto cubo pa advertibo y bisa cu algo ta fout. Su storia ta hopi importante y ta concentra riba esey.
