Spotlight di mundo di timeshare tabata riba nos isla, dor di International Shared Ownership Investment Conference. E prestigioso gigante global Interval International tabata organisado y anfitrion di e evento, den su di 20 edicion. Propietario, desaroyado y ehecutivonan halto di companianan mas renombra rond mundo a asisti durante dos dia di sesionnan interesante.
Aruba ta complaci cu Interval International a scoge nos como sede pa e encuentro aki, ya cu ademas di resalta nos isla como un modelo den e industria, a reconoce e trayectoria di pioneronan Arubiano, manera Raymond Maduro y Jan van Nes, ademas di brinda companianan local e oportunidad di actualisa y avansa den diferente aspecto di e sector.
Den pasado e conferencia aki tabata conoc como ‘Timeshare & Resort Investment Conference’ y den transcurso di tempo a ahusta pa ‘Vacation Ownership Investment Conference’ pareu cu evolucion di e propio industria. Awendia ta papia di ‘shared ownership’, ya cu e modelo anterior conoci como timeshare, caminda e bishitante/turista ta cumpra un ‘fixed week’ na un resort, a cambia considerablemente.
E conferencia a habri cu palabranan di Marcos Agostini como Vice Presidente Ehecutivo pa Bentanan Global y Desaroyo Comercial di Interval Internacional. E aña aki Aruba a conmemora 40 aña di existencia di e industria di timeshare. Na aña 1977 Raymond Maduro a habri e prome propiedad, Aruba Beach Club y cu esey nos isla a comberti den un di e prome destinacionnan na mundo pa ofrece e opcion di tin un propiedad timeshare. Awendia Aruba tin un total di 13 propiedad y ta considera como e capital di e industria den e region di Caribe.
Durante e ultimo decada, Aruba a conoce un crecemento constante di un promedio di 3% di turistanan pa timeshare y esey ta representa 26% di e total di bishitante cu ta yega Aruba pa aña. Aruba ta aprecia e lealtad cu turistanan di Timeshare ta demostra na nos. Nan ta e vehiculo number un den mercadeo, 38% di esunnan cu ta bishita ta indica cu nan a scoge Aruba danki na e recomendacion di un famia of amigo. Nos amigonan den timeshare ta probablemente nos vocero di mas ferviente y esey ta bal oro.
Ademas di un presentacion special di ATSA, e conferencia a analisa e desaroyonan mas recien den e industria, a elabora riba e tema di mercadeo den era digital; e mesun tema cu United Nations World Tourism Organization y A.T.A. a enfoca durante celebracion di Dia Mundial di Turismo. Varios experto local a sirbi como panelista den e conferencia cu a clausura dirigiendo nan mes na participantenan for di riba 20 diferente nacion.
