Temor di Dios ta nifica: Arepenti di nos pica, respeta, obedece, entrega bo bida na Señor, biba cu reverencia na Dios, manteniendo su palabra y su boluntad tur momento na halto den tur cos.
Integridad ta nifica: sinceridad, honestidad, obediencia na Dios, liber di inmoralidad y corupcion, trahando riba nos salbacion cu temor y temblor pa nos yega na bida eterno.
Integridad no ta un label of marca, un pleister of excuus algo pa defende nos mes cu ne. Pero e ta un forma di biba cu ta agrada Dios. Pasobra integridad y temor di Dios ta hiba nos na puresa y santidad.
Caminda tin integridad y temor di Dios no por tin apoyo na maldad den ningun clase. Na prome luga ta respeta Diosden tur cos. No ta exisisti integridad parcial ni tampoco mita temor di Dios. Integridad no ta algo di competi cu ne ken ta mas integro. Pasobra un persona no por ta integro si e no tin temor di Dios.
Pasobra su temor di Dios ta hib’e na integridad. Por ehempel den Job capitulo 1:9, Job su esposa a bis’e: “Ainda bo ta mantene bo integridad, maldiciona Dios y muri.”
Nos tin di corda cu Job a perde tur cos y despues tambe ataca cu malesa di blufein fo’i su corona di cabes te cu su plant’i pia.
Pero laga nos no lubida con Job tabata biba: Job tabata un homber perfecto y recto, un hende cu tabata teme Dios y cu tabata aparta su mes fo’i maldad.(Job 1:1)
Y asina Dios a presenta Job dilanti di satanas, cu Job ta sirbido di Dios. Un persona recto y perfecto cu ta teme Dios y aparta su mes fo’i maldad.
Esaki ta nifica cu ora nos ta integro, nos no por participa den ningun clase di maldad, ni menasa, ni sikiera haci redo.
Den un palabra bisa nos mester tin e caracter di Hesus, kende a pone su integridad na prueba den Mateo capitulo 4:1 -11 y nos tur ta mira na final con e angelnan a bin y a sibri Hesus.
Biba den integridad ta un ehempel di biba pa Cristo y e ta deber di nos tur.
Pasobra diabel ta pasando rond atacando y purba di kibra y daña famia, treciendo tur tipo di bagamunderia den cas di hende y a yega tempo pa tur hende para pa nan integridad..
Nos no por permiti nada cu ta pone integridad di nos hogar y di nos yiunan na prueba, pasobra nos mester tin temor di Dios den tur cos.
Salmo 25 :20+21 ta para skirbi: “Warda mi alma y libra mi. No laga mi keda bergonsa, pasobra mi ta tuma refugio den bo. Laga integridad y rectitud warda mi pasobra mi ta spera riba bo.”
Integridad y rectitud ta bin directamente fo’i Dios, no ta ora bo bira grandi bo ta haya integridad. P’esey Señor ta bisa pa nos lanta nos yiunan den discplina y instruccion di Señor. (Efesionan 6:4).
Ma pa loke t’ami , bo ta sostene mi den mi integridad y bo ta pone mi den bo presencia, pa semper. (Salmo 41:12).
Señor ta warda sabiduria sano, pa esunnan cu ta recto, e ta un escudo pa esnan cu ta cana den integridad. (Proverbionan 2:7)
Un hende husto ta cana den su integridad, ki bendiciona su yiunan ta despues di dje. (Proverbionan 20:7)
Integridad y temor di Dios, ta necesario den bida di tur hende y asina nos agrada Dios.
