Seccion Examens en Toetsen di Departamento di Enseñansa Aruba (DEA) ta informa cu inscripcion pa e Prueba di Naturalisacion 2027 ta habri entrante 9 di november 2026 pa 8’or di mainta te cu diabierna 13 di november 2026 pa 4’or di atardi.
Inscripcion
E biaha aki por inscribi pa e 4 pruebanan di Papiamento nivel A2, cu ta Lesa, Scucha, Skirbi y Papia.
Tambe por inscribi pa prueba di OC & OE (Orientacion Comunidad y Orientacion Estatal).
Pa inscribi pa e Prueba di Naturalisacion 2027 mester yena un formulario di inscripcion online cu por haya door di click riba e link aki: https://www.ea.aw/pages/naturalisatietoets/ of por bay riba nos website www.ea.aw. Riba e website ta busca Naturalisatietoets na letter (N) of Prueba di Naturalisacion na letter (P).
Pa bo por inscribi bo tin mester di un Gmail adres. No por uza otro e-mail adres pa inscribi. Nos no ta acepta inscripcion na balie of via e-mail adres [email protected] ni tampoco [email protected].
Inscripcion ta habri dia 9 di november 2026 pa 8’or di mainta te cu diabierna 13 di november 2026 pa 4’or di atardi. Tin solamente 80 cupo pa cada prueba. Na momento cu esaki yena, ta cera inscripcion.
Tene na cuenta cu na momento di inscribi mester upload e siguiente documentonan den pdf: • un scan (pdf) di paspoort valido;
• un scan (pdf) extracto di registro civil di Aruba (papel di Censo di 5 florin, no mas bieu cu 6 luna);
• un scan (pdf) di e verklaring(nan) otorga anteriormente (si acaso esaki ta aplicabel pa bo persona);
• un scan (pdf) di e Certificado di Prueba di Naturalisacion di Papiamento/Hulandes otorga te cu 2010 (si acaso esaki ta aplicabel pa bo persona);
• un scan (pdf) di bo diploma obteni na Aruba y bo lista final di cifranan (si acaso esaki ta aplicabel pa bo persona).
Di e inscripcionnan cu drenta nos ta acepta y procesa solamente inscripcionnan cu ta completo. Tene bon cuenta cu esaki. E candidato ta ricibi un e-mail pa confirma cu a haya su inscripcion.
E pruebanan di Naturalisacion lo tuma lugar entre 27 januari 2027 y 11 februari 2027.
WWW.EA.AW, WWW.PAPIAMENTO.AW, +297 528 3400, STADIONWEG 37, ORANJESTAD, ARUBA
Mas informacion
Pa mas informacion tocante e Prueba di Naturalisacion por lesa e foyeto di informacion cu por haya riba e website www.ea.aw. Riba e website www.ea.aw mester busca Naturalisatietoets na letter (N) of Prueba di Naturalisacion na letter (P) den e menu di alfabet. Tambe ta sugeri pa sigui e desaroyonan pa medio di nos pagina di Facebook of Instagram @educationaruba.
