Un di e puntonan mas critico cu Jimmy Douglas, representante di Tour Operators Uni, a trece dilanti den e programa Enfoke ta e presencia di vehiculonan UTV y ATV cu ta opera di manera ilegal na Aruba. E situacion aki ta creando un competencia desleal y ta aumentando e presion riba e medio ambiente di e isla.
Centenares di vehiculo sin permiso comercial
Segun e investigacion di e asociacion, ta calcula cu tin por lo menos 200 pa 300 vehiculo ilegal (cu ta uzando permiso di auto/moto normal “V-number” of “MF-V” na luga di un permiso comercial) cu ta core di fiesta y haci tour sin cumpli cu e reglanan estableci.
Douglas a haci un yamada urgente na e departamentonan di control, Polis y DTP pa actua di manera firme contra e operadornan ilegal aki:
“Si bo haci un control y para e ilegalnan pa un par di siman, bo ta baha e cantidad di UTV riba caminda mesora cu mas di 20% te 25%,” el a declara.
Un solucion balansa pa e futuro (Vision 2030)
Douglas a reconose e preocupacion di e comunidad, pero a remarca cu e comerciantenan legal ta depende di e negoshi aki pa alimenta nan famia y cu nan ta cla pa adapta nan mes na e reglanan di un mapa di trabou di largo plaso (rumbo pa e vision 2030).
Loke e tour operatornan legal ta pidi pa e futuro di e sector ta:
Regulacion y control estricto: Pa e operadornan legal cumpli cu ley, tin seguro comercial adecua y respeta medio ambiente.
Eliminacion di competencia desleal: Para e operacion di vehiculonan ilegal cu ta esun cu mas tanto daño ta causando na e imagen y na e naturalesa di Aruba.
MOU cu Autoridadnan: Mantene un dialogo transparente cu Gobierno, AHATA, ATA y departamentonan di medio ambiente pa firma un Memorandum of Understanding (MOU) cu ta duna claridad y stabilidad pa e futuro di e turismo di aventura na Aruba.
E proceso legal y di combersacion lo continua den e proximo dianan pa determina e rumbo final di e sector aki riba nos isla.
