E asociacion interamericano di prensa (SIP) a elogia un proyecto di ley na Colombia destina na contribui pa e stabilisacion di medionan di comunicacion a traves di estimulonan economico y fiscal. E organisacion a insisti na otro gobiernonan di e continente Americano pa promove medidanan similar y a pidi na tur forsa parlamentario Colombiano pa compaña e proposicion.
Parlamentarionan di e partido Cambio Radical a presenta e proyecto di ley 476 na Parlamento dia 1 di december, cu ta reconoce e crisis economico cu e industria mediatico ta atravesa, afecta pa e pandemia y ta establece medidanan di gobierno pa “mantene e stabilidad economico y operativo di e medionan informativo di e pais”. E documento a expresa cu e existencia di medionan di comunicacion ta fundamental pa democracia, como tambe pa e derecho di ciudadanonan ora di yega na informacion.
Presidente di SIP, Jorge Canahuati, a califica e proposicion como positivo y a probecha pa reitera e peticion cu SIP a haci na e gobiernonan di e continente Americano di apoya e medionan di comunicacion cu medidanan financiero y economico extraordinario, pa e rol cu nan ta hunga den e bida democratico. Tambe el a pidi e otro forsanan di Congreso Colombiano pa respalda e proposicion aki.
“Nos no ta pidi pa subsidio, sino un maneho di estimulo cu mester ta transparente, no discriminatorio y respetuoso di e independencia editorial di e medionan di comunicacion.”E iniciativa tin 18 articulo y si aproba nan den e proximo dianan, nan lo drenta na vigor desde dia 1 di januari 2021 te cu december 2025. Entre su beneficionan, ta solicita na e Fondo Nacional de Tecnologia de la Informacion y la Comunicacion (Fondo Unico de Tecnologias de la Informacion y las Comunicaciones) pa financia proyectonan di fortalecimento di e funcionamento di medionan, incluyendo e transformacion digital.
E proyecto di ley aki lo yuda hopi, ya cu e ta riba un solo liña cu e carta habri di juli ultimo y e resolucion cu a emiti durante e Asamblea General na october, riba e urgencia di garantisa e confiabilidad di periodismo independiente y profesional, fundamental den temponan di crisis y emergencia.
Riba material fiscal, segun e proposicion, e medionan di comunicacion lo haya exoneracion di pago di belasting riba publicidad entre 2021 y 2025 y entrante 2025 y durante e proximo 20 añanan, medionan di comunicacion lo ta exonera di e pago di impuesto riba huur, semper y cuando cu nan reinverti nan deficit den e empresa. Tambe ta ordena gobierno pa contrata publicidad y espacionan pa propagandanan oficial y publico sin discriminacion. Ta ofrece incentivo pa e medionan cu a registra un caida di 40% den entrada di propaganda na 2020. Crea mecanismonan pa e medionan por cumpra material te cu 30% di nan consumo anual y facilita e canalnan di distribucion di medionan imprimi.
Como incentivo general na e economia, e proyecto di ley ta establece cu e contractnan di publicidad den medionan lo ta deducibel di e impuesto di interes te cu un 75%. Tambe ta fomenta e subscripcionnan, den cual e ciudadanonan por deduci e costo di nan impuesto riba interes.
SIP ta un organisacion sin fin di lucro dedica na defensa y promocion di libertad di prensa y expresion den e continente Americano. E ta consisti di mas di 1300 publicacion den e hemisferio occidental y tin su sede na Miami, Florida, na Merca. Orguyosamente Headlines Group, e cas editorial di 24ora.com tambe ta miembro activo di e organisacion mundial aki.
