Fundacion Dominicano Arubaanse Juan Pablo Duarte tin mas di 9 aña di existencia y ta cumpli cabalmente cu e rekistonan como fundacion. Pa hopi aña ta haciendo e trabou enormemente pa comunidad di Aruba y henter otro nacionalidad. E fundacion tin un acogida grandi na Aruba. Fundacion Dominicano Arubaanse Juan Pablo Duarte ta reconoci mundialmente, di cual aki na Aruba diferente mandatario ta apoya nan.
E miembronan ta apoyando e fundacion desde su existencia y lema desde e comienso ta union, paz, trankilidad. Union ta haci forsa, segun Winston Tavares, presidente di e fundacion. Nan ta pidiendo tur comerciante Dominicano pa apoya e fundacion aki, pero tambe e comerciantenan local. Por comunica cu e fundacion via 5921679, 5623093 of 5674544, tambe nan tin un cuenta bancario RBC #4473094. Tambe nan ta registra na Camera di Comercio S-1195 y pa cualkier informacion of pregunta, nan ta dispuesto pa duna contesta.
Segun Tavares, nan ta agradecido na China Club p’e donacion cu e fundacion a ricibi conhuntamente cu Fundacion Pa Nos Comunidad (FPNC). Atrabes di tur e añanan a pasa nan a yuda diferente caso, manera personanan interveni na hospital cual bou yudansa di e fundacion y otro colaboracion di departametnonan di gobierno a canalisa esakinan. Nan ta canando den comunidad y ta ricibiendo hopi yamada. E fundacion ta pidiendo pa comerciantenan yuda nan, mirando cu nan ta trahando incansabel pa comunidad di Aruba. Loke cu nan mester ta pampers pa baby, lechi, corn flakes, juice, cumindanan di primera necesidad.
E yamadanan cu ta drentando ta birando hopi dia y e lista di espera ta bira largo. E fundacion ta spera di por yega na henter comunidad, henter comercio. E situacion actual ta un poco dificil, pero si tur hende pone man ta logra. Nan ta felicita tur otro fundacion cu ta haciendo e trabou aki, pasobra mester di union. Ta agradecido cu otro fundacionnan t’ey pa yuda. Tavares a bisa cu normalmente nan ta intercambia idea cu FPNC y eynan e comunicacion ta cana mas lihe.
Den trayectoria di existencia di Fundacion Dominicano Arubaanse Juan Pablo Duarte ta yuda den diferente caso, manera den december nan ta traha paketenan di Pasco. Pero awo cu e situacion di COVID, nan ta mas bezig cu tipo di accionnan aki y lo keda haci esaki tanten tin comestibel. Tur esaki ta depende di comercio y e miembronan cu ta aportando. El a sigui bisa cu nan tin hopi miembro cu a perde trabou y por comunica cu e fundacion pa mira ki por haci pa nan.
