Awe Minister di Turismo y Salud Publico, Dangui Oduber, a vocifera di ta hopi contento di por mira 3 barco crucero mara na nos waf. Segun e mandatario, esaki sigur ta duna un señal hopi positivo pa cu e recuperacion di Aruba su turismo crucero. E mandatario a menciona, cu segun e proyeccionnan di Aruba ports Authority (APA), cu Aruba lo recupera 60% di su turismo crucero den aña 2022, den comparacion cu aña 2019 cu tabata un aña record caminda a ricibi casi 830 mil turista crucero.
Minister Dangui Oduber a trece dilanti cu Aruba su turismo crucero no a pasa den su miho momento den e ultimo 2 añanan pa motibo di e pandemia. Ta apenas den luna di juni di 2021 Aruba a ricibi su prome barco crucero na momento cu e frontera maritimo a habri bek, despues cu esaki a cera pa mas di 1 aña y 3 luna.
Den aña 2021 e turismo crucero a cera cu solamente 16% di recuperacion den comparacion cu aña 2019 segun e mandatario. Pero Minister Oduber ta hopi contento con e recuperacion ta bayendo y tambe e proyeccionnan positivo cu APA tin.
Tambe Minister Oduber a trece dilanti cu e “Exit Strategy” cu a ser anuncia dia 17 di januari ta den pleno ehecucion pa asina Aruba bolbe bek den normalidad. Aki gobierno ta bay flexibilisa tur medida pa asina tur hende por biba un bida normal cu nan ta custuma di dje prome cu e pandemia.
Tur esaki ta posibel mirando cu actualmente di menos di 100 caso activo di COVID-19 compara cu 1 luna pasa cu Aruba a conoce casi 5 mil caso activo. Esaki ta haci posibel pa gobierno bay sigui enfoca riba e recuperacion di nos turismo crucero y nos turismo en general. Tambe pa sigui percura pa e recuperacion di Aruba su economia pa asina crea tur e oportunidadnan cu mester crea pa Aruba su economia por florece bek.
Finalmente Minister Oduber a menciona di ta hopi contento con e luna di februari a habri den comparacion cu e luna di januari y e ta sumamente optimista di con henter aña 2022 lo bay, den cual Aruba lo bay recupera 100% di su turismo bek.
