Tres talento di Corsou, uno di Aruba y un di Hulanda a uni riba un anochi pa presenta cancionnan di e islanan Caribense Hulandes den un estilo clasico.
Ta trata aki di Tamara Nivillac, Vernon Chatlein, Alexander Kraft van Ermel, Danny van Kessel y e soprano Arubiano Imara Thomas. Mester bisa cu Thomas ta contrata pa Deutsche Oper am Rhein na Düsseldorf y Duisburg.
E tema di e concierto cu a tuma luga den Het Concertgebouw tabata yama A Night with Caribbean Classics, unda cu e dos vocalistanan Nivillac (Corsou) y Thomas di Aruba a wordo compaña pa musiconan di of di descendientenan di Corsou. Nan a presenta obranan clasico di compositornan manera Jacobo Palm y Wim Statius Muller, y tambe di Padu Lampe, segun e programa traha ta indica.
E tabata un anochi special pa amantenan di musica clasico pero tambe esunnan cu ta stima Caribe, principalmente e islanan Hulandes y e cultura di Caribe.
Esaki tabata e di dos biaha cu ta organisa e Caribbean Currents y intencion ta pa cada biaha presenta otro talentonan di mundo.
Loke cu a hala atencion den e concierto aki ta cu e soprano ta Arubiano y el a presenta un cancion di nos Tata di Cultura Padu Lampe (dfm). Pa e ocasion aki tabata presente den e concierto su yiu muhe, Vivian Lampe.
Thomas a conta nos cu di chikito e tabata gusta canto, principalmente gospel. Semper e tabata impresiona cu e stem di Whitney Houston.
Scuchand’e canta cada bes, su famia semper tabata bis’e cu e tin hopi talento pa musica clasico. Diadomingo anochi el a presenta “Abo so” di Padu Lampe pero tambe composicionnan di Jacobo Palm, Wim Statius Muller. Pero e tabatin e honor di tabata riba escenario hunto cu nieto di Muller, esta Alexander Kraft van Ermel, kende a compañe riba piano.
E ta canta clasico di Caribe y cancionnan di rond mundo den manera un bachi diferente di loke e hendenan conoce semper. E ta gusta pa duna bida na musica di siglonan anterior pero den un forma nobo. E mes tin gana di skirbi cancion nobo pa cual a bini cu un combinacion Caribense cu un generacion nobo di zonido Caribense.
Thomas a expresa cu e ta sinti un orguyo grandi cu e por a topa cu Padu Lampe durante un anochi di gala na Cas di Cultura. Y tambe e echo cu su yiu Vivian Lampe tabata presente diadomingo anochi.
Mira e sala yen tabata “un gozo grandi” pa Imara Thomas. E kier presenta pa mas hopi hende posibel y cu su presentacion por ta inspiracion pa otronan.
Pa Alexander Kraft van Ermel tambe e tabata un anochi hopi special. E tabata un anochi di cancionnan antiek cu musica moderno. “Nan a haya un forma pa combina e dosnan aki y haci algo masha bunita”.
El a bisa cu tabata masha bunita pa mira e hendenan canta y baila cu e artista y musiconan. Tambe a presenta loke su welo a presenta cu Tica Giel pero a dun’e un bida nobo.
Despues di e presentacion di diadomingo anochi nan decision tabata unanime: Esaki no tabata e ultimo biaha di e combinacion.
Mientras cu ta presenta e composicionnan di e talentonan grandi di e islanan, manera p.e. Padu y Muller, nan lo keda biba. “Ta manera cu bo ta mira nan sinta den sala tambe,” Alexander a bisa. “Loke nan a traha ta nos cultura. Bo por bisa ken bo ta, pero e musica ta papia tur cos di kende nos ta. Ora cu bo ta bay leu di cas, e prome cos cu ta ponebo yora cu ne ta ora di scucha e musica di bo isla. Bo ta sinti falta di loke tur ta caracterisa e islanan, nan calor y e hendenan,” e artistanan a bisa.
Thomas a expresa e deseo pa den futuro nan por presenta un concierto asina’ki na Aruba, un Caribe Clasico.
E organisado di e evento aki ta Vereniging Vrienden van Het Concertgebouw y Koninklijk Concertgebouworkest.
E genero musico cu a presenta tabata jazz, clasico y pop.
