Lakie Richards ta e defensa rechts di S.V. La Fama y ta entre e hobennan deportista di e bario di Savaneta cu ta hopi contento awo cu e construccion di e mini veld di yerba artificial a cuminsa.
Den aproximadamente dos luna, e lo ta completamente cla pa e usa hunto cu su compañeronan di ekipo. Pa Richards, e facilidad cu Gabinete Mike Eman a percura p’e atrabes di su programa ‘BoBario’ cu cooperacion di comitenan olimpico Arubano y Internacional. “Ami ta pensa cu ta great; un bon idea pa La Fama y un build up nobo pa nos tur,” Richards a comenta momentonan despues cu Prome Minister Mike Eman a pone e prome blokki. E hoben ta kere cu e facilidad nobo no solamente lo sirbi pa e muchanan hunga y disfruta di nan tempo liber, pero tambe lo tin un efecto positivo riba e comunidad en general. Adicionalmente tambe e veld cu yerba artificial ta brinda e hungadornan di La Fama otro tereno pa entrena riba dje y asina ahusta facilmente na cualkier luga cu mester bay hunga. Aunke nan a cuminsa custuma cu e veld cu tin na Yara, awo nan lo tin e posibilidad aki riba nan tereno mes.
Richards ta kere cu e veld ta bay yuda nan hopi den e proximo campeonato cu nan ta bay p’e. “Nos ta bin duro,” el a bisa. Mescos cu e veld chikito aki na La Fama, Gabinete Mike Eman ta bay construi cinco otro mini turf artificial pa futbol na Arsenal na Angochi, Centro di Bario Dakota, Centro di Bario Bubali, Club Estudiantes Primavera, Centro di Bario Ayo y Cura Cabai Zuid. Di mesun manera e Gobierno aki a percura pa diferente otro trabounan importante na beneficio di deporte manera batting cages, reparacion di veldnan, renobacion di facilidadnan deportivo y ekipo di fitness na luganan publico.
