Entre e diferente personanan presente na e ceremonia di groundbreaking di e mini veld di futbol na S.V. La Fama, tabatin miembronan di su directiva manera por ehempel, Cathy de Cuba- Garcia.
E president pa e seccion infantil, hubenil y di damas den e organisacion deportivo a haci eco di nan satisfaccion grandi pa e facilidad cu ta haya. “E ta algo sumamente grandi pa La Fama; e ta fit perfectamente den loke nos kier pa nos organisacion,” de Cuba-Garcia a bisa. Siman pasa lider y miembronan a presencia momento cu Prome Minister Mike Eman a pega e prome bloki pa construccion di e piso di un mini veld di futbol cu yerba artificial, cu mescos cu S.V. La Fama, cinco otro organisacion rond di Aruba ta haya tambe danki na e programa di BoBario. Mescos cu den otro iniciativanan pa mehoracion di bario, ta busca sosten financiero di sector priva y organisacionnan internacional, manera International Olympic Committee (IOC), den e caso aki. E facilidad ta aporta grandamente na S.V. La Fama su plan y meta pa mehoracion y pa saca e miho di e muchanan. Pesey de Cuba Garcia ta haya cu e ayudo di Gabinete Mike Eman ta uno hopi importante y a confensa cu ya caba e por nota con entusiasma e muchanan ta. “Naturalmente e ta mas cu bon-bini, e ta algo hopi grandi,” e dirigente deportivo a expresa.
Hopi biaha S.V. La Fama ta traha hunto cu Piscina Olympico Roly Bislick y scol Colegio Sagrado Curazon pa yega na e espacio y facilidad necesario na bienestar di e muchanan. E veld nobo cu yerba artificial ta amplia e red aki di cooperacion. E cohesion social aki ta hustamente loke ta forma parti di e vision di Gobierno pa mehoracion di bida den barionan. S.V. La Fama, mescos cu otro organisacionnan deportivo di Savaneta y rond di Aruba no a yega di conoce e apoyo aki for di ningun gobierno, manera ta e caso durante gestion di Gabinete Mike Eman I y II. “Pa fin di augustus mi tin entendi nos lo tin e veld caba. Esey ta increibel paso nan a yega di bisa nos cu nos ta bay haya un veld y nos a kere cu ta djis un promesa, pero awe e prome parti ta realidad y nos ta sumamente emociona.” Ademas di e mini veld di futbol, BoBario y otro iniciativanan di Gobierno a percura pa renobacion di Joe Laveist Sport Park y Compleho Deportivo Frans Figaroa, mescos cu trabounan di diferente tamaño na veldnan di bala na Calabas y Rockets, entre otro. Tambe tin e batting cages cu a laga traha pa muchanan practica miho na Grasshoppers y asina tin mas ehempel pa menciona.
