Manera cu nan a indica den nan carta di 10 di mei ultimo unda cu ta hala Gobierno su atencion pa pone nan recomendacionnan, for di aña 2019, un banda, College Aruba financieel toezicht (CAft) un biaha mas ta sigui construi su caso riba Gabinete Wever-Croes. Ta parce cu un instruccion di parti di Conseho di Minister di Reino pa medio di un Decreto Real (KB) ta birando inevitabel.
Den un carta fecha dia 10 di juni, e colegio di supervision financiero pa Aruba, ta informa Gobierno di Aruba oficialmente di no ta cumpliendo cu e recomendacionnan. Di e forma aki tambe ta inicia oficialmente e trayecto legal pa duna conseho na Conseho di Minister di Reino pa nan duna Gobierno di Aruba un instruccion pa medio di un KB.
Luna pasa CAft caba a pidi Gobierno pa tene cuenta cu no menos cu 13 recomendacion. Despues di un luna CAFT mester constata cu Gobierno a cumpli parcialmente cu 1 di e condicionnan so – esta di laga SVb cobra e placa bek cu a paga inhustamente na loonsubsidie di manera proactivo – pero e resto di e recomendacionnan Gobierno ta opta pa pone nan un banda un biaha mas. E recomendacionnan cu no ta haya oido di parti di Gobierno ta, entre otro, reduccion di gastonan operacional di Gobierno cu 40 miyon florin, resolve e asunto di Serlimar, mantene e recorte salarial di empleadonan publico cu 12.6%, introduci medidanan den seguro medico, cobra mas impuesto y mantene e gastonan di personal na nivel di 2017. Conscientemente, Gobierno y Parlamento di Aruba, a pone e recomendacionnan aki un banda y CAft (lesa: Hulanda) su pasenshi ta cabando.
CAft ta para keto specialmente na gastonan di operacion di Gobierno, como tambe gastonan di personal. Aunke cu mandatarionan ta desmenti y ta declara cu Gobierno ta hasiendo tur esfuerso pa corta gasto, e cifranan compila pa CAft ta mustra un panorama totalmente contradictorio. Gastonan di oficina di minister, huurmento di edificio, contratacion di conseheronan via nan compania y gastonan di abogado a aumenta cu 48 miyon florin for di aña 2017. A pesar di e priminti di lo a mantene e gastonan aki constante ora a firma e protocol na 2018, esakinan a subi di manera structural despues cu na aña 2015 a cuminsa un trayecto pa reduci esaki. CAft ta subraya specialmente gastonan di huurmento di edificio cu a aumenta cu 40% for di momento cu Gabinete Wever-Croes I a sinta, como tambe contratacion di conseheronan externo a aumenta cu 13% compara cu 2019. Bou gastonan di operacion tambe tin e contribucion na empresanan estatal cu no ta solvente, manera Serlimar, Post y Arubus cu te ainda Gobierno no a presenta un solucion pa nan.
Un otro area cu a conoce un aumento structural ta gastonan di personal di Gobierno, a pesar di tur e promesanan haci na Hulanda prome cu pandemia den e.o. e protocol y e plan di maneho pa reduci gastonan di personal (BVP). Aunke cu for di 2020 a parce cu Gobierno lo tabata bahando gastonan di personal, esaki tabata meramente resultado di recorte salarial introduci na 2020 cu CAft ta recomenda pa mantene vigente a pesar di loke cu Gobierno a bisa di a palabra cu Hulanda. Si haci un comparacion di gastonan di personal, sin tene cuenta cu e recorte di 12.6%, no por conclui otro cu e gastonan di personal a subi di manera structural. Na 2018 a palabra cu gastonan di personal mester a keda na 417 miyon florin, pero awendia Gobierno ta paga 422 miyon florin na salario di personal incluyendo e recorte, pero realmente e cifra ta 470 miyon florin: esaki ta un aumento di 53 miyon den solamente 4 aña!
Mester menciona, CAft a fundamenta su ultimo carta di un manera hopi structura y ta parce di ta ripiti su recomendacionnan. Pero no ta keda CAft nada otro di ripiti esakinan di manera structural, pasobra ta di un manera structural Gobierno ta pone esakinan un banda. Gobierno tin awor te 24 di juni proximo pa splica con lo cumpli cu e 12 recomendacionnan cu falta. Den caso cu e contesta no ta satisfactorio y Gobierno ta keda sin cumpli cu e normanan financiero ancra den ley y e protocol firma cu Hulanda na 2018, no ta keda CAft nada otro di conseha Conseho di Minister di Reino pa duna Gobierno di Aruba un instruccion pa medio di un KB.
Loading…
Reload document 
Open in new tab Tocante CAft
Riba dia 2 di september 2015 a institui College Aruba financieel toezicht (CAft), conoci tambe como Colegio di Supervision Financiero Aruba. Nan tarea ta encera monitoria y duna conseho, riba adaptacion y ehecucion di presupuesto di pais Aruba, kedando den balans y den e limitenan acorda, pa por cumpli cu pago di debenan. CAft por duna conseho sea cu Gobierno a pidi of no. CAft ta consisti di Raymond Gradus (Presidente), Hans Hoogervorst (postula pa Hulanda) y Hellen Van der Wal (postula pa Aruba).
