Hues a laga ambos sospechoso di traficacion di oro den libertad

999

Ayera Corte a inicia cu tratamento di e caso den “proforma” di traficacion di oro. Abogado mr. Eldon Sulvaran di Corsou a defende interes di ambos ospechoso, pues tanto di G.Z. como di Juan Carlos “Toro” Rodriguez. Despues di scucha peticion di ambos sospechoso pa haya libertad condicional y despues di scucha e argumentonan di Fiscal di Ministerio Publico, Hues a dicidi na final cu no tin motibo pa sigui wanta e dos sospechosonan tras di trali. Bisando esey, e prome ta cera desde februari ultimo y “Toro” a keda 10 dia cera.

Na inicio e sospechoso a haci uzo di e servicio di mr. Helen Lejuez como su abogado pero na caminda ambos a cambia pa un abogado di Corsou, cu a logra saca ambos for di prizon.

A baha e sospechoso G.Z. for di un vuelo di KLM pa Hulanda riba 9 di februari ultimo y a detene mesora. E tabatin 46 bara di oro cu ne na valor di 2,1 miyon Dollar.

E accion tabata un iniciativa di Afpakteam Aruba, Ministerio Publico, RST (Recherche Samenwerkingsteam) y KPA. E base di investigacion ta informacion procedente di Hulanda y Curaçao.

Afpakteam ta un cooperacion di Ministerio Publico, Polis, RST, Aduana, Fiot (Fiscale inlichtingen- en opsporingsteam) di Departamento di Impuesto, FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba y Meldpunt Ongebruikelijke Transacties (Meldpunt) y ta traha riba combati criminalidad financiero economico.