Asociacion di Laboratorio a perde un caso sumario cu nan a entama contra Organo Ehecutivo di Seguro Medico General (AZV).
E asociacion menciona a entama e caso pa entre otro evita UO AZV di introduci tarifanan nobo conforme mercado pa testnan di laboratorio pa su aseguradonan y evita UO AZV di structura e testnan segun e dunado di cuido cu solicita esaki.
Pa loke ta e introduccion di tarifanan nobo, hues den su evaluacion ta indica cu basa riba e ley di AZV, OU AZV tin e libertad pa introduci tarifanan nobo, na final di cada contract, semper y cuando esaki ta real y aceptabel. Pa por haci e cambio aki, hues ta menciona cu AZV mester mantene su mes na diferente criterionan cu ta aplica ora ta termina of cancela un contract manera ta e criterionan “redelijkheid en billijkheid”.
Hues ta constata cu desde 2019 caba UO AZV a informa di e intencion di introduci tarifanan nobo y cu e landspakket a acelera e proceso aki. Hues ta considera cu UO AZV a hiba un periodo largo y amplio di preparacion.
E sistema di tarifa nobo cu UO AZV kier introduci ta uno basa riba e sistema Hulandes adapta na e situacion na Aruba. Durante e periodo di preparacion a scucha e puntonan di obhecion entrega pa laboratorionan y a ahusta debidamente. Hues ta indica cu e hecho cu OU AZV na diferente ocasion a invita e laboratorionan pa sinta individualmente y for di nan situacion particular yega na un areglo di transicion pa facilita e implementacion ta muestra suficiente cu UO AZV ta cumpli cu e criterio di “redelijkheid y billijkheid”.
Pa loke ta e structuracion di e testnan den di dos linea, hues ta rechasa e ponencia cu UO AZV no tin e libertad pa cumpra e testnan di e cuido for di e di dos linea exclusivamente cerca e laboratorio di hospital.
Hues ta enfatisa cu UO AZV tin e obligacion pa mediante e contractnan cu e ta cera di sirbi e interes colectivo, garantisando cuido di calidad, eficiente y pagabel pa su aseguradonan.
Na final, hues ta rechasa tur demanda di e asociacion y ta dicta na fabor di UO AZV. Basa riba e sentencia aki, UO AZV proximamente lo invita e laboratorionan priva pa discuti e siguiente pasonan.
