Aunke cu e no a presenta cu un abogado, e acusado Chania Fernandes Pedra, envolvi den e accidente fatal di 4 di januari, 2026, cu a costa bida di dos persona, a haci peticion pa pospone su detencion. Esta haya su libertad te ora cu tin un decision den e caso aki. Hues a nenga e peticion aki.
Durante e momento cu el a haya chens pa hiba palabra, e acusado a expresa arepentimento pa loke cu a pasa dia 4 di januari ultimo. El a pidi famia, kendenan tabata sinta den e sala abou, su disculpa pa fayecimento di e dos personanan. E victimanan den e accidente fatal aki ta Josely Paulina Vasquez Gonzalez di 65 aña y Carlos David Vialez Valerio di 54 aña.
Y despues el a conta hues con e situacion aki ta afect’e emocionalmente, e ta algo cu nunca el a pasa den dje. Pero alabes ta algo cu ta den su mente henter dia. “E lo keda cu mi pa resto di mi bida,” el a bisa na Ingles.
E tabatin tres peticion na hues di cual un ta di e abogado, riba cual Hof a dicidi caba. Hues a bis’e “ni ami ni ministerio publico por kita e decision di Hof cu a rechasa pa uza e abogado Moszkovich di Hulanda”. Y el a pidi pa su libertad bou di condicion te ora cu tratamento di su caso tuma luga.
El a pidi tambe a scucha testigo, pero riba esaki lo tuma un decision durante e regiezitting di 20 di augustus.
Te na final hues a dicidi riba e peticion di su libertad, cual a nenga tambe. A splica e acusado cu e peticion pa su libertad a bay cerca corte, na hof, pa raadkamer y hues comisario. Tur tabatin e mesun decision: no por lag’e liber.
A splica e acusado cu ta trata di un caso hopi serio unda dos persona a perde nan bida y cu a conmove e comunidad. Incluso recientemente, durante declaracion di e partidonan envolvi den prensa y unda cu Ministerio Publico a haya su mes ta bini dilanti pa aclaria algun asunto, a nota cu ainda e emocionnan riba e tema aki ta halto.
A mustra tambe cu e tin varios acusacion contra dje y cualnan hunto ta colga un posibel castigo halto si yega na condena. P’e motibonan aki no por lage liber. Ademas, hues a agrega, den un periodo cortico di cuater luna e tratamento profundo ta tuma luga caba.
Pues Chania Fernandes Pedra ta keda deteni.
Dia 20 di augustus awo lo tin e Regiezitting y riba 2 di october tin e tratamento profundo. “Ta bo responsabilidad pa bo tin un abogado,” hues a bis’e.
