Diabierna mainta durante tratamento di e caso penal di 4 di januari ultimo unda un pareha a perde nan bida di un forma cruel, ta resulta cu Ministerio Publico mes no a finalisa cu su investigacion.
Supuestamente tratamento di e caso no por a sigui pa motibo cu e acusado Chania Fernandes Pedra (25) no tin abogado oficialmente. Pero ta resulta cu Ministerio Publico tambe ainda tin mas trabou pa haci.
Na inicio fiscal a bisa cu e ta bay manda pa Instituto Forensico na Hulanda e computer di e vehiculo envolvi den e accidente fatal. Nan ta spera cu di esaki lo por saca mas informacion di con e auto tabata move e anochi aki.
Pakico ta te awo ta dicidi di manda esaki, no a menciona nada. Pero loke si fiscal a bisa ta cu e lo bay mand’e otro siman pa Hulanda. Pero cu e no tin idea cuanto tempo lo dura pa saca informacion for di e computer.
Otro asunto ta cu ainda e rapport di psycholoog tampoco ta cla. E ta algo cu nan ta spera cu por tin e pa e siguiente regiezittig cu lo ta dia 14 di augustus awo.
E acusacionnan contra e acusado ta:
•Dood door schuld
•Poging tot doodslag of zware mishandeling
•Sigui core despues di accidente
•Stuur bou di influencia
•Stuur sin cu tin un rijbewijs valido
E victimanan den e accidente fatal aki ta Josely Paulina Vasquez Gonzalez di 65 aña y Carlos David Vialez Valerio di 54 aña.
