Cada trahado di Wind Creek Aruba, cu ta doño di e hotelnan Renaissance, nan casinonan y Starbucks, por cobra un bonus di 300 dollar of 525 florin asina cu nan caba di vacuna. E bonus aki ta bin como un forma pa curasha tur e trahadonan di e hotelnan den centro di Oranjestad, pa por vacuna y asina ta evita di por contagia cu Coronavirus y evita di por contagia e huespednan eyden tambe. Na final e hotelnan kier logra di por avisa nan clientenan cu ey nan ta sigur, ora nan keda cerca nan.
Esaki ta e prome hotel na Aruba cu ta lansa un campaña asina, den cual e trahado na final lo resulta beneficia, tanto pa su salud como den su cartera. Wind Creek, cu a percura pa paga y mantene su trahadonan na trabou durante henter e pandemia, atrobe ta demostra nan compromiso cu nan trahadonan.
“Ta dificil pa kere cu nos ta atende cu e crisis di COVID-19 pa mas di un aña caba. E tabata dificil pa nos tur, specialmente boso cu a contagia cu e virus aki. Desafortunadamente, nos miembro di team Jorgen Velasquez a fayece siman pasa pa complicacion di Coronavirus. Pa 26 aña Jorgen tabata parti di nos famia y nos lo haya su falta”, asina e gerente general di Wind Creek Aruba, Paul Gielen, a skirbi su coleganan den un carta oficial di compania.
Tur indicacion ta cu turistanan ta planeando masalmente pa bishita Aruba bek y e hotelnan Wind Creek kier ta prepara. “E conseho basico cu nos a ricibi y cu nos mester sigui, no tin cambio. Bisti tapaboca, mantene distancia entre nos mes y laba man. Higiena ta yuda limita nos habilidad di plama COVI-19 na esunnan rond di nos. Awo vacuna ta disponibel pa tur hende y mi ta curasha tur miembro di team pa vacuna mas pronto posibel. Siman pasa mi tabatin mi afspraak y mi a haya mi prome shot di vacuna”, di acuerdo cu Paul Gielen.
“Mi ta contento di anuncia cu Wind Creek ta ofrece tur empleado un bonus di $300 na tur cu vacuna. Tur loke bo mester haci ta pasa Recurso Humano cu bo certificado di vacuna pa mustra cu bo a haya ambos dosis”, asina Paul Gielen a skirbi tur su 750 coleganan cu ta traha na e dos hotelnan, dos casinonan y na Starbucks. Na tur ta papia aki di 750 colega cu awor tin e opcion pa ricibi un bonus di e compania, asina cu nan vacuna.
Si tene cuenta cu ta regala tur empleado 525 florin, ta nifica cu na tur e compania a pone casi 400 mil florin disponibel na bonus pa su empleadonan cu ta vacuna. Di e forma ey e compania Wind Creek kier curasha su trahadonan pa ta vacuna y asina mas lihe por ofrece servicio normal atrobe na huespednan.
E compania Wind Creek Hospitality ta pertenece na Poarch Band of Creek Indians di Merca a cumpra e hotelnan y casinonan di Renaissance di Aruba y Corsou na aña 2017 for di MetaCorp. Renaissance Aruba ta conta cu 431 camber mientras cu e hotel na Corsou tin 237 camber. Ambos tin casino tambe pega na e hotel.
