Waf chikito tin e comerciantenan chikito cu ta traha duro tur dia cu ta depende di turismo pa nan logra sobrevivi.
Pero diabierna nan a lanta cu un sabor amargo. Comerciante Ady Saladin ta di un generacion cu a traha semper na Waf Chikito, cu awendia ta sigui maneha e negoshi pa asina nan por biba.
Algun dia pasa e negoshi banda di dje, cual ta di un otro famia a bira victima di ladronicia. Den e siman cu a pasa a kibra drenta den e luga, pero no a logra drenta. Pero si a hinca e comerciantenan den un gasto di mas of menos mil florin pa nan por a drecha full e porta bek. Net net e ladronnan no a logra kibra pa drenta den e luga. Por a mira tur e inversion cu mester a haci pa asina por mantene ladron pafo.
Despues di un siman, e ladronnan a bay n’e omo unda nan a logra drenta. E forma cu nan a haci nan fechoria, ta increibel. Nan a kibra varios candal por lo menos cuater. Tambe por a nota e desaster cu e antisocialnan a haci den e localidad. A bolter tur cos den e negoshi, bay full paden y a bolter e cosnan tambe.
E comerciantenan aki ta depende y lucha pa nan por sobrevivi, pasobra casi no tin barco tampoco y awo turismo a cuminsa lanta cabes.
Tur esaki tabatin su consecuencia, pasobra nan no por a habri nan negoshi, mirando cu nan mester a warda pa autoridad bin y haci nan investigacion.
Ady Saladin, propietario di e kiosco cu a invadi, ta conta cu tabata un dia tristo p’e y su famia y net riba un ‘Black Friday’.
Saladin ta conta cu su casa a bin haya cu a kibra drenta den su luga. El a conta cu e tin un mal custumber di laga algun cen los den caha y ladronnan tambe a bay cu ne, como tambe algun holoshi, cartera, souvenir. Ta hopi cos nan a horta. Tristo ta cu pa hopi aña largo nan ta traha pa yega na algo y den un solo biaha nan a perde hopi. “Awo ta con ta bay haci,” Saladin ta cuestiona.
Ni un siman pasa a kibra horta cerca e sobrina y a keda di bay check na e joyeria parti pabao si tin camara pa mira. E sobrina te dia di awe no a haya ningun contesta. Saladin ta pensa cu esaki ta e sorpresa pa nan cu den 12 dia, ya tin dos hortamento.
A bisa tur e otro comerciantenan pa percura reforsa nan porta mas ainda.
Mientras tanto Saladin mester a warda te ora cu bin tuma fingerprint y tuma dato di loke a horta pa despues e por habri y sigui cu e negoshi. Con cu bay con cu bin, e daño ta haci.
Pa un cobertura mas amplio lesa e edicion di TREMPAN di mañan.
