Tur museo, tanto na Playa, Fort Zoutman, Museo Historico, y na San Nicolas, Museo di Industria y museo di comunidad, tambe na e location di Carnival Ephoria, cual ta un exhibicion di Carnaval, tabata habri di 10’or di mainta pa 6’or di atardi, a ricibi un gran cantidad di persona.
Segun Anky Vrolijk, presidente di Fundacion Museo Arubano, e fluho tabata un tiki mas druk mainta, parti atardi tiki mas rustig, y e experiencia cu a pasa dia 25 di Januari, ta spera cu mas tanto a bira druk atardi, ora cu tur hende bay pa finalisa na Nicolaas Store, unda cu tabata tin Rincon Boyz y na Playa pa 4’or di atardi tabata tin N’Fuzion.
Preparacion
Segun Vrolijk, e gerentenan tur ta responsabel pa nan museo of locations, caminda cu a traha duro como un team pa busca sponsor. Tin cu bisa cu danki na tur sponsor cu a haci esaki posibel. E gastonan tabata basta halto, pero a enfoca tambe pa percura cu tin bandanan tambe cu ta popular, pa asina por atrae tambe mas cantidad di hende cu ta yuda cu bendemento di cuminda y na e bar.
Esaki ta un celebracion cu e fundacion tabata tin den e ultimo añanan. E preparacion tabata hopi, pero por mira cu el a bay hopi bon, Vrolijk a splica por ultimo.
