Despues di algun reunion entre e organizacion di Beach Tennis (BTA), Gobierno di Aruba y tur departamentonan concerni, awe nos por confirma cu tur cos ta cla confirma pa e torneo mas grandi na mundo den e deporte di Beach Tennis, cual ta Aruba Beach Tennis Open 2019
Bushiri Beach Park lo ta e escenario nobo pa e evento e aña aki, cual ta conta ya caba cu un participacion di 1600 persona di mas cu 44 pais. E highlight di e aña aki ya cu EuroSport lo ta televisando e evento riba nan canal mundialmente. Esaki sigur ta un logro grandi pa ambos e deporte como tambe pa e organisacion local, kende nan ta hinca hopi esfuerso pa hasi e evento aki cada aña di nobo, uno diferente, mas grandi y sigur cu mas ambiente pa esnan cu ta presencia e torneo
Sigur un di e aspecto nan positivo pa cu e localidad nobo ta cu lo tin mas espacia di staciona, ora di bishita e evento. Fecha nan ya ta conoci y akinan tambe por tuma nota, cu debi na e cantidad grandi di participante, a tuma e decision pa rek e evento cu 2 dia extra. Diabierna dia 8 Nov lo tin registracion, diasabra 9 y diadomingo 10 lo tin singles tournament. Dialuna 11 y diamars 12 tin mix tournament, diaranson 13 Nov tin Team & Nations Cup. Diahuebs 14 Nov lo cuminsa e torneo oficial mes, cual ta e ITF Aruba Open 2019 y esaki lo termina diadomingo anochi. Esnan cu ya a bishita e evento aki, sa cu e after parties nan ta conta cu un ambiente total, cu animacion di tanto DJ y banda nan local
Keda pendienta ya cu den e siman nan nos dilanti, lo tin mas informacion, entre otro si lo logra confirma cu Aruba lo ta e huesped pa un aña mas di e Panamarican Beach Tennis Tournament. Si esaki ta e caso, e evento total lo tin un duracion di 2 siman cual tambe automaticamente lo hisa e cantidad di tursita cu lo bishita nos isla. Pa mas informacion boso por bishita nos FB page Beach Tennis Aruba y keda informa di cada aspecto di e deporte di Beach Tennis
