Homber a dal yiu muhe y nieto formalmente den parkinglot di Ennia

4613

Diahuebs Polis a bay pura den direccion di Ennia na Eagle. A drenta informacion cu tin mayornan maltratando un mucha. Polis a yega haya un homber sinta pafo den parkinglot.

Ta trata di Johan de Jager di 63 aña di edad. E problema no tabata cu mayornan a maltrata yiu chikito. E problema tabata cu e tata riba e foto aki a dal su yiu muhe di 33 aña y tambe e nieto cu tin 10 aña di edad. E mama a bay na Ennia pa paga seguro. E tabata acompaña pa su tres yiunan.

Un baby, un yiu di 9 y uno di 10 aña. E yiu muhe di 33 aña no ta papia cu su tata pa hopi tempo. Ora cu el a yega na Ennia, el a topa cu dos familiar di dje. Su tata tabata cu nan. E tata a drenta y kier a papia cu e yiu muhe pa atende problemanan cu e tin cune.

E yiu no kier a papia cu e tata y a pidi seguridad pa atende cu e situacion. Mientrastanto cos a calma paden. E famianan a caba cu nan respondi na Ennia y a sali bay. Ora cu e yiu muhe a caba, e dos familiarnan no a bandona e sitio. A keda pafo den auto cu e tata. E tata Johan de Jager di 63 aña a baha for di auto y bin discuti cu su yiu muhe di 33 aña.  

Na dado momento e tata a dal e yiu un mokete den cara. E yiunan di 9 y 10 aña a core pa bin yuda nan mama. A bay pa dal nan welo y e welo a dal esun di 10 aña bente bon leu. E mama a core drenta Ennia pa bati alarma. A yama Polis y Polis a papia cu e tata pafo sinta y despues tambe a bay paden pa papia cu e yiu muhe. Polis a intermedia y pidi e yiu muhe pa bay dokter pa e sla fuerte na cara y despues pasa entrega un keho official.