Kustwacht tin vocero nobo: Ora comunidad mira algo ta bon pa comunica na 913

Shalick Clement ta e vocero nobo di Guarda Costa di Caribe Hulandes. Apesar cu el a bin di un sector totalmente diferente, e ta den e sector di siguridad.

E ta conta cu como organisacion nan ta depende di comunidad. Si comunidad mira algo cu ta fuera di lo comun, ta bon semper pa nan comunica di Kustwacht. E intercambio di informacion semper ta bon. Dimes Kustwacht ta haci su trabao pa traha riba e siguridad y evita iregularidadnan riba lama.

Vocero nobo: Kustwacht ta haci su trabao pa traha riba siguridad y evita iregularidadnan riba lama

Vocero nobo: Kustwacht ta haci su trabao pa traha riba siguridad y evita iregularidadnan riba lama

Posted by 24ora on Friday, January 25, 2019

Pero dimes, si comunidad tambe mira algo, ta hopi bon pa por yuda y tambe e comunicacion cu comunidad di parti di Kustwacht, tambe ta hopi importante, pasobra semper nan ta habri pa papia di nan operacionnan y kico ta para p’e.

Metalsharknan na Corsou

E Metalsharknan a resulta bon na Corsou. For di Juli 2018 nan ta operacional na Corsou. Na cuminsamento tabata tin algun problema chikito, pero esey semper ta haya ora cu ta traha cu botonan nobo. Dimes nos awanan di Caribe ta hopi bruto, hopi salo. Aki aya tabata tin algun ahuste y na Aruba tambe tin algun ahuste cu a tuma luga, pa por saca e miho di e botonan, pa nan por funciona operacionalmente.

A scorte na Corsou

Segun Clement, e Metalsharknan na Corsou a haci algun bon trabao y operacion, interceptando asina botonan cu droga y arma.

Number di emergencia

Number cu semper 24/7 ta habri pa tur hende comunica cu Kustwacht ta 913. Eynan ta haya e team di e Centro di rescate y coordinacion, cu semper ta para cla pa tuma informacion y tambe den caso di emergencia, pa nan por tuma accion y sali mesora y yuda.

Banda di e operacionnan riba cosnan iregular y ilegal, tambe nan tey cu e parti di buskeda y rescate, caminda cu si hendenan tin problema cu nan motor, nan a paga of no kier sende, of nan boto, pa tal motibo a sink, no kier start mas, cosnan cu ta pasa cu hopi iregularidad, tambe ta bon pa hende informa y bisa kustwacht pa por sali yuda nan, pa nan por yega cas bek safe.

Presencia di kustwacht

Kustwacht tey 24 ora pa dia. Nan ta riba lama proactivo y reactivo. Proactivo den e sentido cu nan unidadnan ta riba lama y na laira constantemente, cu patruya. Ora cu ta riba patruya, si detecta algo na e momento ey, mesora Kustwacht ta bay soluciona y haci un operacion.

Den e caso reactivo, ta ora cu un persona yama na e number 913 y indica unda e problema ta of unda tin un caso, e ora ey ta manda e unidad cu tin e momento ey disponibel y ta pensa cu por haci e trabao mas lihe, ta sali bay haci un investigacion pa wak kico ta pasando. Ta manda e ora ey esnan riba tera, mirando cu nan tin un unidad riba tera, pero dimes ta trabaonan na costa di lama. Tambe nan tin nan botonan, e Metalsharknan entre otro, cu tambe por sali. Kustwacht tin diferente unidad cu por bay den accion, sin lubida nan Dashnan y tambe helicopter, unda cu nan tin wowo for di halto.