Diadomingo marduga un accidente a tuma lugar cu a tuma mas cu un ora largo prome cu finalmente polisnan a keda cla cu detencion. Un hoben bebi coriendo den forma iresponsabel a accidenta rancando palo di luz y bay dal finalmente den vangrails. Un recherche cu tabata riba caya a topa cu e accidente banda di 3or di marduga na rotonde Sero Blanco. A mira e situacion y ta pidi pa manda coleganan di patruya di Playa na e sitio.
https://www.facebook.com/24ora.aruba/videos/10160327798475001/
Polis na nan yegada a topa cu amiganan di e chauffeur accidenta. Nan tabata hopi rabia pasobra net algun minuut prome nan a baha e persona na cas na Sero Blanco despues di Lighting Parade y e tabata bebi. El a coy su auto pa bay topa un joncuman amigo di dje. Polisnan dimes ora un accidente ta sosode ta atende mesora mira si tin hende herida. A topa un senjora atendiendo cu e chauffeur. E chauffeur a scapa pasobra tur airbag den e auto a bula. Polis mes a purba papia cu e chauffeur cu tabata bebi y no tabata copera masha.
E tabata monta henter un show den e auto sinta. Djey dos miembro di Cruz Cora a yega na e sitio y a mira e chauffeur sinta na stuur ainda. Nan a bisa Polis cu kizas ta mihor manda un ambulance pa nan yude y bay cune hospital pa chekeo medico. Esey a sosode pero mientrastanto e amiganan tabata hostina cu e comportacion di e chauffeur. Nan mes a pidi pa Polis lage supla. Nan kier pa e sinja su les pa futuro pasobra no ta prome biaha. E joncuman amigo cu el a sali bay busca tambe a presenta na e sitio. E amiganan a hera come bibo pasobra nan ta culpe di ta parti di e desgracia aki. Ta pa bay topa cune el a coy auto bebi bay kibra esaki riba e rotonde di Sero Blanco rancando e palo di luz y sigui bay dal den e vangrails. Finalmente ambulance a yega na e sitio y paramediconan a baha pa bay atende cu e chauffeur. Ora cu e dama paramedico a bay atende cune a medio corta e airbag bula pa asina por atende cune. E homber a cuminsa zundra cu a corta e airbag cu ta kibra. Hasta el a bisa e dama paramedico pa hala for di su auto. A bise cu nan a bin pa yude. Cu tur e expresion y insultonan e paramediconan a baha e cama y yude tog.
E chauffeur bebi a baha cu cara tapa pa ningun hende mira kende e ta. Den ambulance e cos a bira peor. Ora e tabata wordo atendi e no kier a copera den ningun forma. El a bay asina leu di coba mama di e paramediconan. Eynan si e amor pa yuda un hende a conoce un fin. Nan a pidie baha for di e ambulance. Asina mes el a keda ofende e paramediconan y na dado momento mester a ranke bise baha. Polis a cay aden mesora y a bay over na detene y boei e chaufeur. A pidi pa dogcatcher pa bin buske. Un familiar di dje tambe a cuminsa hala su atencion seriamente y puntre cuanto desgracia mas e kier keda causa y sea mata hende of mata su mes pa actuacionnan asina. Polis a pone den jeep di Polis y sperando e dogcatcher pa hibe warda. Den auto di Polis el a logra los su mes for di e boeinan. Tur su man tabata rasca dor di maniobra pa sali for di e boeinan. Mester a pone boei di nobo y aki tambe e no kier a copera facilmente. Despues di bay cune warda, a bisa e famia y amistadnan cu nan mester busca takelwagen pa bay cu e auto. E auto ta pa bende y no tabata tin ningun documento valido pa ta legalmente riba caminda. Personal di Elmar tambe a bin y hunto cu Polis a logra hisa e palo di luz pone un banda. Despues di basta rato cu henter e caso a logra pa habri e caminda atrobe. E Polisnan ta testigo di tur loke a sosode y paramediconan mester pone tur cos den un rapport pa asina defende nan mes. E chauffeur bebi deteni a bay conta Polis Sub Fiscal cu e Paramediconan a nenga di yude. Kiermen su show no a termina na Sero Blanco pero a sigui tambe na warda di Polis despues di wordo transporta.
