World Series of Poker (WSOP) lo t’ey bek na Aruba despues di dos aña y ta un di e evento mas popular di poker cu ta tuma luga rond mundo. Pa prome biaha e lo ta teni den Caribe y Aruba lo ta e anfitrion di e circuito Mericano aki. Compara cu ultimo biaha e lo ta mas atractivo p’e hungadonan internacional.
Segun Jeannot Lacle, manager di operacion na The Casino at Hilton Aruba, e evento ta spera di tin yama atencion di mas di 200 hungado di poker rond mundo cu un premio garantisa di 200 mil dollar.
Tambe The Casino at Hilton Aruba lo ta anfitrion di varios torneo durante e proximo dianan prome cu e evento mes cu lo tuma luga dia 9 te cu dia 19 di december. Lo bay tin un recepcion di bonbini hunto cu Balashi. Esey lo ta un tremendo evento di bonbini pa e hungadonan internacional.
Fuera di esey tin varios torneo ta tumando luga p’e hungadonan local cu kier join e evento principal cu lo tuma luga den luna di december.
P’e evento cu nan tin e luna aki, tin e re-enter tournament, cu a tuma luga dia 19 di november, y lo continua dia 22, 24 y dia 30 di november.
Tambe nan tin MVP, cu lo garantisa un asiento p’e evento principal. E hungado cu mas ora hunga den luna di november lo tin su asiento garantisa durante e evento principal.
Encuanto e programa p’e evento principal, Lacle a splica cu nan tine online riba medio social y website. E evento lo ta pa 10 dia largo. Lo bay tin 12 renchi oficial di e evento di WSOP. Esey lo ta otorga tur dia durante di e torneo. E lo ta un torneo sumamente grandi, unda cu tin hopi hende ta bin for di tur skina na mundo. Despues di dos aña, tur hende tabata en espera pa The Casino ta anfitrion di un torneo di WSOP na Aruba.
Fuera di esey The Casino tin su Poker Room cu ta habri tur dia for di 6:00 pm te cu 2:00 am y tambe e casino ta habri for di 11:00 am te cu 2:00 am. Nan tin diferente promocion durante dia y si bo registra n’e casino bo lo haya bo carchi, pa asina bo acumula punto.
Ta spera cu abo pasa n’e casino, bin disfruta y participa n’e torneonan cu tin y gana bo asiento den e WSOP 2021/2022 cu lo tuma luga otro luna.
Pa loke ta Brouwerij Nacional Balashi, Corine Smith, gerente di benta, ta contento di ta forma parti di e evento anual aki. Tambe el a menciona di ta contento tambe di ta e distribuidor di cerbes Chill y Balashi p’e torneo aki.
