Dia 20 di juni tabata Dia Internacional di Refugiado na nivel mundial. Aki na Aruba a tuma e decision pa no conmemora esaki, pa motibo di eleccion.
Relaciona cu esaki, awe 25 di juli, HIAS Aruba a recorda y celebra Dia Internacional di Refugiadonan. HIAS ta un organisacion internacional cu base na Washington. E ta un di e organisacionnan di refugiado mas bieu na mundo.
Yiftach Millo,director di HIAS Aruba a cuminsa na splica cu inicialmente e tabata un organisacion hudiu cu tabata yuda e hudiunan cu tabata huy for di persecucion. Pero actualmente nan ta yuda tur refugiado rond mundo, den diesseis pais. Na 2019, HIAS a cuminsa funciona na Aruba. Loke nan ta haci ta purba di indentifica e persona – of famianan mas vulnerabel y purba na mitiga cualkier risico cu nan ta atravesa, si esaki lo resulta den un situacion dificil, nan risico mental, dignidad, etc.
Riba e dia aki a invita comunidad Arubano, Venezolano, Colombiano y Dominicano, tur otro migrante, pa bin y celebra e lucha mundial. Den e ultimo aña HIAS tabata tin situacion unda nan tabata tin e cantidad mas grandi di migrante y refugiadonan, como tambe e cantidad mas grandi di personanan cu a bandona nan hogar. E cantidad di persona cu ta bandona nan hogar pa busca siguridad den exterior. Aruba ta un di e paisnan cu ta comparti e carga y solidaridad, door di acepta un cantidad grandi di Venezolano cu ta busca asilo na Aruba.
Millo a bisa cu mas tanto ta ciudadanonan Venezolano ta esunnan cu ta busca asilo. Aki na Aruba, esaki ta bay via DIMAS. Lastimamente, na otro paisnan ora di busca asilo e persona ta haya oportunidad pa traha, pero aki na Aruba esaki no ta e caso. Esaki ta haci e situacion mas dificil y aki ta caminda cu HIAS y otro organisacion, ION, UNTR, Crus Cora, Fundacion pa Nos Comunidad ta bini hunto pa purba yuda e comunidad aki, door di e stress cu nan ta atravesa ta grandi.
Den e ultimo aña y mei, door di e pandemia, e stress entre comunidad Arubano tabata grandi, y esaki tabata pio entre e comunidad di e migrantenan cu mester a apoya nan mes y nan famianan den exterior.
HIAS tin un hotline 730-7770 unda cu e migrante por yama pa asina wak den kico por yuda nan. Tambe por indica nan e caminda corecto den caso cu nan mester yudansa legal, of si nan mester di cuminda, ta yuda nan drenta den contacto cu Fundacion pa Nos Comunidad.
Por ultimo, Yiftach Millos a bisa cu nan tin un relacion cercano cu sociedad civil y tambe varios ministerio, e.o. Ministerio di Educacion, di Salud. HIAS ta envolvi cu e proceso di vacunacion pa esunnan cu no tin AZV. Realmente, e ta un esfuerso di tur esunnan envolvi.
Si bo conoce un persona cu mester di asistencia, please tuma contacto cu HIAS na nan hotline.
