Polis a sorprende Johnny Sneek y Jo Jo Antersijn hortando den Star Fashion

E yamada a drenta y den menos cu un minuut, tres unidad di polis di Oranjestad a yega na e sitio y a gara dos ladron conoci hortando. Nan a kibra e rolluik di Star Fashion den Caya Betico Croes. E dos ladronnan ta conoci di Polis. Ta e conocido Jo Jo Antersijn y Johnny Sneek. Nan no ta worry cu ta den dia cla.

Algo pasa di 2:00m pm nan a haya bon di kibra e rolluik y djey kibra e vitrina. Na Star Fashion ta bende paña di damas y bikini. Esey ta duna indicacion cu nan a bay horta cos pa bende.

Ningun di dos lo bay bisti bikini of paña di hende muhe. Polis a sorprende ambos y a detene nan mesora. Tur cos ta mustra cu nan a logra drenta pasobra di pafo tabata mira sanger y Johnny Sneek tabata herida.

Polis mas biaha ta topa cu e dos individuonan aki hortando. Awor nan a cuminsa horta hunto. Por bisa cu e polisnan a reacciona rapido y esey tabata un tremendo trabou pa evita cu e dos ladronnan a logra scapa.